Nagaland aser Mizoram CM-i Centre nem Manipur tebilemtsü metetdaktsü

Kohima, Sept. 11 (TYO) : Manipur nung tang Inner Line Permit (ILP) amshitsü akangba onük nung mepetmesü adoka aliba tebilemtsü ya anendaktsütsü asoshi center sokari tebang aitsüla ta Nagaland aser Mizoram Chief minister nati metetdaktsüogo.
India nung North East nung aliba state-tem ya tanga state-tem dang nungi balaka kin kidong balala ajanga sendaktepa lir, anungji ibaji meteta inyaktsüla ta Chief minister anati center sorkar dang metetdaktsü.
Manipur ya telok asem agi küma lir, itemji ka Hindu yimsü dak amanger Meitei nungertem aser Khristan telok anaji Naga nunger o Kuki-Mizo nungertem na lir.
Tan Hombar nü Nagaland Chief minister T.R Zeliang-i Union Home Minister Rajnath Singh ajurua jembidang, Manipur nung atalokba tia ajak shiogo aser taoba ita August 31 nü Manipur tatar senden nung latetba ozüng asemji magizüktsü atema Manipur angh dang ashitsü asoshi temepishiba ken o ka agütsüogo ta angazüker.
Ano, kasa onük nung Mizoram Chief minister, Lal Thanhawla-ia Prime Minister Modi dangi züluba shidi ka nung, center sorkari Manipur tatar senden nung latetba ozüngji magizüktsüsa inyaktsüla, kechiyong ibaji Manipur nung alir Naga aser Kuki- Mizo kintem anema lir ta metetdakja lir.
August 31 anogo nung Manipur Assembly nung ozüng asem lateta lir, itemji Protection of Manipur People Bill, 2015, Manipur Land Revenue & Land Reforms (Seventh Amendment) Bill, 2015, aser Manipur Shop & Establishment (Second Amendment) Bill, 2015 lir. Item ozüngtem jagi Manipur nung aliba tribal nisungtem anema inyaktsü ta Naga aser Kuki-Mizo nungertem kanga shisaboluteper.
Manipur lima ya bendanger ket nungi kümzüka ayutsü asoshi tamalen nungi ILP amshitsü akanger, ajisüaka Meitei masüba Naga aser Kuki-Mizo kintemi maginer. Ano, kasa lendong atalokba maparen nung meimchir temeten anema inyakba osang angashia Amnesty International telokia item lendongtem ajanga nisungtem timtemba mapatem bushisüngdangtsü metetdaktsüogo.