Nagaland nem ‘Best Eri Silk Producing State’ award agutsü

Kohima, February 11 (TYO): Taoba Honibarnü New Delhi nung mega silk sentong – Surging Silk agiba mapang nung Union Minister of External Affairs, Sushma Swaraj-i Nagaland state nem ‘Best Eri Silk Producing State’ award agutsüogo.
Deobarnü Twitter handle ajanga iba osang metetdakja Nagaland Chief Minister, Neiphiu Rio-i, Nagaland-i linük nung sericulture aser silk industry ajungkettsütsü atema inyakba asoshi state nem award agutsüogo, ta metetdaktsü.
Nagaland Chief Minister Rio-i, “New Delhi nung silk sentong tuluka- Surging Silk agidang MEA, Sushma Swaraj-i Nagaland nem, ‘Best Eri Silk Producing State in India’ award agutsü. Iba award ajanga India nnung sericulture aser silk industry terenlok atema Nagaland-i inyakba mapatem züngshir,” ta ametetdaktsü.
Iba sentong ya Vigyan Bhavan, New Delhi nung ‘Surging Silk’ omen nung ajemdaker agi aser sentong nung tongti tejaokerji Union Minister, Sushmita Swaraj liasü.
India nung ‘Best Eri Silk Producing State’ atema Nagaland shimba osang metetdakja tamalen February 5 nü Nagaland Chief Minister Rio-i pa indang Twitter handle ajanga Sericulture Department nung staff züngsemtem nem tenüngsang agüja liasü.
Honibarnü iba sentong nung jembidang Union External Affairs Minister, Swaraj-i, global markets nung silk ajungkettsütsü atema textiles ministry-i akokba tashi nungia yaritsü, ta metetdakja liasü.
Union minister Swaraj-isa, silk ya kanga nüngdak opset ka lir, aser international markets nung kanga bushir, ta ashi.
Kasa sentong nung jembidang Union Textiles Minister, Smriti Zubin Irani-i, 2013-14 küm nungi tenzüka silk adokdaktsüba shilem 41 agi timba kümogo, ta metetdaktsü.
Kasa sentong nung silk industry nung lenla balala ung junga inyakertem nema sempet agutsü aser state aajungpur kar nem awards agutsü.
China sülenbo India ya silk timtiba adokdaktsüba linük lir.