Imnameren nem Smart Idea Innovation Award agutsü

February 10, 2019 nü Guwahati nung Assam Education Minister, Siddhartha Bhattacharya-i Imnameren Imsong nem senpet 10,000 indang cheque agutsüba noksa nung angur. 

Guwahati, February 11 (Agencies): Regional Science Centre, Guwahati-i ayongzüka anogo ananü Innovation Festival amongba sülen Deobarnü Nagaland nungi Wb. Imnamaren Imsong nem Dinanath Pandey Smart Idea Innovation Award 2018 agutsüogo.
Osang angazükba agi, Imnameren Imsong ya Dimapur nung Suhoi village nungi lir.
Imnameren Imsong-i state terenlok atema tasen purapiteta inyakba atema pa nem iba award agutsüogo.
Assam education & Guwahati development department minister, Siddhartha Bhattacharya-i pa nem iba sempet agutsü, aser iba sentong nung Regional Science Centre, Guwahati regional coordinator, Basudev Mandal den nüngtugu scientist tem liasü.
Iba Festival nung Sikkim densema Northeast tesem ajungalen nungi aser West Bengal nungia densema innovative projects 40-i shilem agi.
Regional Science Centre, Guwahati nung February 9 aser February 10, 2019 anogotem nung iba festival amongba mapang nung ak farming technology machine densema purapiteta yangluba oset tasen aika sayaogo, aser item rongnung Imsong-i yanglutetba pig farming technology machine ajanga nisung timba pua-a liasü.
Northeast India nung ak metsüba farming ya kanga tongtibang. India nung ak nütsüng shilem 28 bo northeast nungi lir.
Ak ki yangluba aser osettsüset aliba nung sen ishika indokba den külemi ak junga metsüba aser tashidak junga nokdangtetra ak metsüba nung tajangzük kanga angur.
Imnameren Imsong-i yanglutetba nungji ak farming nung tongtibang lenla asem lir aser itemji- chiyungtsü, mesüba aser shiruru anepaluba lir. Item innovations ajanga ak metsürtem taliba ajangzüktsü.
Asür, Dinanath Pandey ya Assam nungi nüngtugu science worker ka aser innovator ka liasü, pai technical machines aika yangluteta liasü.
Regional Science Centre, Guwahati aser science fraternity-i kümshia Pandey bilemteta loktiliba nung temelenshi adokdaktsütsü atema tasen purapiteta yanglurtem nem pa nüngtem nung iba award agutsür.