NSCN nung Q Tuccu Chairman aser Tongmeth Wangnao V-Chairman shim

Dimapur, February 11 (TYO): Hombarnü National Socialist Council of Nagalim (NSCN) indang National Hoho alidang Chairman, NSCN/Yaruiwo inyaktsü atema Qhehezu Tuccu aser Vice-Chairman NSCN/Vice-President, GPRN inyaktsü atema Tongmeth Wangnao shim.
Tanü Ato- Kilonser Th. Muivah-i Qhehezu Tuccu Chairman aser Tongmeth Wangnao Vice Chairman inyaktsü shimba osang metetdaktsü. Tena ya Yehzabo nung aliba ama küm 6 kümsük atema President aser Vice-President ama inyaktsü.
Taoba Chairman asür Isak Chishi Swu aser Vice-Chairman asür Gen (Retd.) Kholi na alima nungi pila aoba sülen menden tazüng liasü. Qhehezu Tuccu aser Tongmeth Wangnao naprong Collective Leadership nung züngsemtem liasü.
Tanü sentong nung tena nem NJB Convener (Chief Justice) Khriesarokho Peseyie-i tezüngzüktep agidaktsü.
Q Tuccu ya February 20, 1945 nü aso aser pai 1980 nung Naga National Service nung aden. Pa ya Nihoto village, Dimapur nungi lir aser 1982 küm Acting Chairman, UT inyakba nungi Chaplee, Keya Affairs, Forest & Environment aser Mines & Minerals indang Kilonser inyakba den Steering Committee züngsem ka liasü. Iba sülen 2013 nung Collective Leadership nung züngsem ka aküm.
Tongmeth Wangnao ya 1958 küm aso aser 1987 küm Naga National Service nung aden. 1995 tashi pa Secretary ka ama inyak aser iba sülen Tatar ka ama shim. 1998 nungi pa Chaplee, Kilo, Education, MIP nung Minister mapatem inyak. Iba sülen pa Tatar Hoho Speaker shim, Steering Committee züngsem aser NJB Convener ama inyak. 2013 küm pa Collective Leadership nung züngsem asütsü shim.
Ato Kilonser Th.Muivah-i o tatsü ka jembidang “Naga nunger ya tesamaba kin ka masü kechiyong asen lennirtem Imkong Meren aser AZ. Phizo nungertemi mapang shitak nung telemtetba shitak agi. Naga nungeri pei litsü aser tarutsü kibur asütsü aser Nagalim ya Khrista asoshi asütsü” ta ashi.
“Alima melenshia arudang linük aika samaogo saka Naga nungertemi Khrista den alitsü ta telemtetba shitak agiba ajanga asenok mesama lir. Asen lennirtemi nüktzü aser azü agüja iba telemtetba agia aliba nungi asenok pilara, Tsüngremi asenok dang mepelatsü” ta Th. Muviah-isa shisem.
Taoba Chairman Isak Chishi Swu-i Yisu Khrista tenüng nung Naga nunger longjemtsü ta sangoktsüba sülen anidaktsü ayongzüker. Asen anemertem ket nung tamakok mangutsü atema asür Isak Chishi Swu-i otsüsütsü aketba Framework Agreement nung sign asü, ta paisa metetdaktsü.
NSCN ketdangsertem ya nübortem aser linük alema matutsü aser onoki Yehzabo aser Nagalim for Christ” tangatetba sülen anidaktsü, ta Ato Kilonser Th. Muviah-isa shisem.