Mokokchung nung kaketshirtemi tanülar mongdang akar

Dimapur, September 11 (TYO): Tanü, Hokolbar nü nungi tenzüka Mokokchung kübok Town Hall nung kaketshir meyirijang aikati pei school uniform semer kakeshirtem asoshi ayongba tanülar mongdang nung shilem agitsü tenzükogo.
Tarutsü mapang nung kaketshirtem asüngteta takokba nung jajadaktsütsü nükjidong nung Ao Kaketshir Mongdang (AKM) aser All Nagaland Private School Association (ANPSA), Mokokchung nati külemi lungjemer ‘Save Generation’ omen nung ajemdaker iba mongdang ya anogo 3 agitsü asoshi ayonga lir.
“Asen lokti ya ochimashiba timtem maliba lokti ka kümdaktsütsü asoshi kaketshirtemi bendanga agüja inyaktsüla,” ta tanü mongdang tenzükba sentong nung tongti tesemdanger, Nagaland School Education Minister, Yitachu-i ajungshia ashi.
“Ochi inyakbaji meimchir taküm alitsü aser Tsüngrem den tesendaktep tajung ayutsü asoshi tamendakdak lung kija lir,” ta shia, kin o kin na tsüngda sempatepba aser ochimashi inyakba ajanga nisunger lokti tentet jirepdaktsür ta pai metetdaktsü.
Tan sentong nung Rev. Ketou Teunuo, Rev. Moa Longchari, Rev. Dirang Lungalang, Akok Walling, Rev. Dr. Mar pongen aser Chujang nunger tongti o jembir alitsü.
Iba mongdang den sentaktepa Mokokchung kübok Lotha Baptist Church nung school tesayur aser tsürapur atema shisadokten sentong balaka ayonga lir aser iba sentong nung shilem agirtem nem Pheluopfhelie Kesiezie aser Akok Walling nati shisatsü agütsütsü renema lir.