NE terenlok asoshi centre-i fund peria agütsütsüla:NEC secy

Shillong, September 11 (Agencies): North East (NE) nung rongsen ketsüng aser nübur aoshi terenlok mapa ketdangsüa inyaker North Eastern Council (NEC) nem centre-i fund peria agütsütsüla, ta Hokolbar nü Council secretary Ramnganing Muivah-i ashi.
NE nung nisung million 40 lir koba South Korea den kasa lir, aser ibaji atema sen crore 700 kija agütsüba agi kecha mesütettsü, ta pai ashi.
Tanü, Hokolbar nü ketdangpur rongi aitsang Muivah-i, NE nung chief minister aser Governor tem, shirnok NEC nung züngsemtem lir, parnok ajaki centre dang fund peria meshiba maparen nung külemi shilem agitsüla, ta ashi.
NE infrastructure reloktsü asoshi sen jenti nüngdaka aliba metetdaktsüdang NEC nung Tongti züluri, “Centre-i NEC nem senotsü tesüiba mapang dang nungi tali agütsütsü nüngdaker,” ta ashi.
Kechiba centre-i fund yamai ajema agütsür ta asüngdangang, Muivah-i, “Ashiko asenoki ang centre dang memeshiteter sülaba. Tetenzük nungi parnoki asenok nem sen crore 800 tema kodanga magütsüdangi arur,” ta langzüa liasü.
Tang agüja aliba sen ajak ita tenet tashi nung terenlok mapa inyakdang amshiadoktsü ta ashiba mapang pai, sen ajakji nüngdangba nung aser ajaki meteta intoktsü. Sangküm February ita tashi nungbo sen talila meshizüktettsü akok, ta shisem.
Meghalaya aser Arunachal Pradesh state nabo tan mongpu atema teinyaktsütema ano magütsüi lir, ta NEC Planning Adviser J Lhungdim-i shiogo.
Iba dak alia tanga state tembo ajaki tan mongpu atema teinyaktsü tem agütsüogo. State ka nungbo mongpu ka asoshi terelok mapa atema sen crore 2,000 dak tema nüngdaker aser Manipur kija nung sen crore 934 nüngdaka lir.
NE nung nüngdakba terenlok mapatem tuteta ashiba mapang Muivah-i, NE state nung yimtiba ajak 4 lane Highway ajanga tesendaktep alitsüla, district headquarter aser train station ajak 2 lane Highway agi sentakteptsüla aser tzü tajemtsü, temang anepaluyim aser kaketshisatsü peria alitsü nüngdaker, ta ashi.