Chandrababu Naidu-i citizenship bill anema vote agütsütsü

February 12, 2019 nü Naga Students’ Federation aser North East Students’ Organization lennirtem New Delhi  nung agiba noksa ka angur. 

New Delhi, February 12 (Agencies): Northeast lennirtemi Citizenship (Amendment) Bill, 2016 anema nübo ayimer aser Mongulbarnü parnoki Andhra Pradesh Chief Minister N Chandrababu Naidu den ajurutepa pa teyari meshi.
“Iba bill ya Assam aser Northeast nung lisopurtem anema lir. Onoki Bill anema noktaktsü” ta tanü Naidu-i New Delhi nung ashi.
Andhra Pradesh Chief Minister-i Andhra Pradesh nem ‘special status’ agüjang ta takhangba agüja New Delhi nung lungkak aiter.
BJP sorkari lokti nung telemsa adokdaktsüba politics asayar, ta pai aitsür.
“Asenoki Punjab aser Jammu & Kashmir nung kechi atalok’ar nguogo. Ibaji Northeast nung matalokdaktsünür. Ozü teloki ashishitep aketba Bill anema vote agütsütsü” ta Naidu-isa metetdaktsü.
Rajya Sabha nung Chandrababu Naidu’er Telegu Desam Party (TDP) MP 6 lir.
Congress-ia kechi südir süaka Citizenship (Amendment) Bill anema noktaktsü ta nenshia metetdaktsüogo.
“Onok iba tangatetba nung akangakanga noktaka lir. Sorkar nem nübortem anemba bill meyangludaktsütsü. Iba Bill ya Assam nunger taginüba anema lir” ta Assam Pradesh Congress Committee (APCC) president Ripun Bora-i ashi.
NESO teshimtet telokisa Meghalaya Chief Minister Conrad K Sangma den ajurutepa bill anema mapa inyaktsü atema tebilembatem lemsatep.
“Centre sorkari Rajya Sabha nung Bill benokra, National People’s Party (NPP)-i NDA teloktep nung madentsü” ta Conrad-i metetdakja lir.
Külen, Krishak Mukti Sangram Samity (KMSS) president Akhil Gogoi-ibo Centre sorkari nisungtem alizüker ta tai tongloktsür.
“Sorkari Rajya Sabha nung MP pezü dang senden nung madentsü atema mesüzükogo” ta Gogoi-i ashi.