Okadaki Arnab anema FIR benoktsü tuyu

Guwahati, February 13 (Agencies): Patiala court-i Delhi police dang Republic TV editor-in-chief, Arnab Goswami anema FIR ka benoktsü atema tetuyuba agütsüogo.
Congress lennir Shashi Tharoor-i pa anema ken o ka benok ta Bar & Bench-i ashi.
Tharoor kinungtsü Sunanda Pushkar asüba indang bushisüngdangba osang aser iba dak sendakba police records kar Goswami-i reprang ta Shashi Tharoor-i ken o benokba nung shia lir.
Iba ken o bushisüngdangba ano metembang lir anungji osangji yimjak nung mesüra media den lemsateptsü temelaba mali. Iba news channel yagi parnok viewership atutsü atema pa tenüng menükja jembi ta Tharoor-isa shia lir.
Republic TV-isa Tharoor dang masüngdangi pa indang email tem reprang. Sunanda Pushkar asüba dak sendakba nung sentong balala nung parnoki temai madoktsü aliba kulitem reprang, ta paisa ashi.
Pai Police dang kulikakettem auyaba aser pa indang email tim mesüi reprangba indang ken o benokogo saka tang tashi parnoki kecha meinyaker ta Tharoor-isa metetdaktsü.
Metropolitan Magistrate, Dharmender Singh-i January 21 nü Delhi Police dang tai tonglokja alirtem anema FIR benoktsü atema tetuyubaji agütsü.