PM Modi-i Lok Sabha nung tatembangbuba onük jembi

New Delhi, February 13 (Agencies): Tanü Ato kilonser, Narendra Modi-i Lok Sabha senden nung tatembangbuba onük jembidang pai aniba NDA sorkari inyakatetba mapatem metetdakja liasü.
Ato kilonserisa opposition aser Congress Party Tir, Rahul Gandhi aija jembi.
Yaküm July ita nung Parliament nung Rahul Gandhi-i pa dak azüitba aser pa mendeni meyipa aoba sülen tenük mesepshiba tiluja Modi-i, “Tang mezüng yagi (Parliament) aruba sülen ni aika angazükogo. Tang mezüng ni ‘azüitba aser tangari apanglokba’ na tepilaji metet,” ta ashi.
Yaküm Rahul-i Modi dak azüitba sülen pa mendeni meyipa oor Congress MP, Jyotiraditya Scindia repranga tenük mesepshiba dak sendakba nung tanü Modi-i, “Parliament nung tenük tim mesüi amshiba ni tang mezüng angu,” ta ashi.
Mongolbarnü “Hug Day” anogomong nung Congress-i Instagram ajanga, “Tanü onoki BJP dang shinübaji kanga tongmelang: Azüitang, tesempa,” ta post süa liasü.
Tamalen Rahul Gandhi-i, ‘Parliament nung ni demonetization indang jembira menokmok anoktsü,” ta jembiba aija Modi-i, “Asenoki menoknok indang angashiogo, ajisüaka tesüiba küm pongu nung menoknok manok,” ta ashi.
Modi-i jembiba onüktem rongnung: “Alimai global warming atema jembir aser iba tebilemtsü atema India-i International Solar Alliance atema inyak.”
“Linük rongsenkettsüng US sen 5 trillion akumtsü atema tang linük lenmang shidak nung jajadar,” ta pai ashi.
“Ochimashi sen aser ochimashi anema onoki ozüng tesashi yanglu,” ta pai ashi.
“Küm 30 sülen majority sorkar ka tentet,” ta paisa ashi.