Yakta aika tongtetba

Tanü lima ya kanga karaa aienba lima ta jembiba tetezü ya osangtsüsang aser nisungtem dang masü saka khu dena tekaratiba nung atongtsü aser tongtsütsü merangba putu asüba agi jembir. Akhidang tetsüng agi shidi aser khu bener jaja, iba sülen shiruru nem bendaktsü, iba sülen tzüyim nung rong, ali tema nung gari aser train aser anüngdak tayimtsü nung ta ka nungi ka ta tekaraba-tekaraba bener oagi tongtsütsüsa nisungtemi purapiteta yanglutetogo. Item jagi tanü putu nung nisungtem anisüngzüker. Joko, tanü asüng tanurtemibo tetsüng agi lenmang talangka jajadang komaka aniar memetet aser tekolak nung khu abenba agi tekolak teret tashi koda netyoka aiar memetet kümogo. Aji oda, tetsüng agibo gari nung jajar memenep aser gari nung jajaribo tayimtsü nung jajar memenep ta alimaji arishia memenep aienba ya asenoki angur aser ajangshir. Iba ama putu ka nung asenok Nagaland-bo state kümer küm 55 tashi nunga Assam majangibo gari nunga aser train nunga tadongtsü ka metongtettsüsa asenok senzütsü lenmanga meyanglutet anogo shia timtem ajurur. Tayimtsü anendaka Dimapur nung dang alinungji, Assam ajanga senzütsü purtem asoshibo aiben timtem ajurur. Asenoki angateta inyaktsüba kaji, nübortemi peisasa aluyimtettsü saka gari aser train senzütsüsa lenmangbo meyanglutettsü. Iba kasaji nübortemi factory tapu balala lapoka nüngdak oset aser chiyongtsü ajak yanglutettsü saka electric light-bo madokdaktsütettsü. Iba tangatetba nung government-i light aser lenmang agütsütettsüla aser nübortemia mapa ajak government nem dang metongloktsüi state nung light tashi dang peria ngura aser lenmang dang junga yanglutsüra pei tashi aser pei kolok amshia rongsen züindaktsütsüla. Atangji, Nagaland ajaklen National Highway aser state Highway agi tangjema lir saka itemji tenüng dang ashi kasa Highway-sa asüyonga tanga state-tem nung yanglua akaba Highway dang nungi Nagaland nung akaba highway-sa tilaba aser tamajungba yanglutetter. Iba jagi minute ishika nung atongtsüba agi ghonda nunga matong nübo atsüker aser chiyongtsü raksar. Joko, tanübo nisung, osettsüset aser chiyongtsü dang masü saka long dena asen lima nungi tanga bendang limai bener aotsü asüngdanger, kechiyong tanga bendang lima aika nung long temerang tajung mali aser asen lima nungbo kiojen aser lenmang yanglutsü asoshi tajungtiba long angur. Aji oda, tang tangbo asenoki tangar ama ali tema aser telong nung aliba rongsen reprangteta tagitsü küma meyanglutettsüa akok saka ali tuabo yoktettsü aser longa menünga yoktettsü. Ajisüaka, gari tulu nung aser train nung ali aser long abentsüsa lenmang yanglua mekara kidang chiyongtsü tazü akaba agi tamen küma soruchioka mechiyongtet amai asütsü. Itemji yimdangi arua tanübo government-i asen lima ajaklen gari tulu nung khu tulu bener senzütettsüsa lenmang sademsadema yanglutsüla aser Tuli tashi danga mesüra Mokokchung tashi danga khu abenba aser nisung amenba train atutettsüsa train lenmang yanglutsüla. Tuli tashibo paper mill atema yangluba train lenmang lenjen lir, anungji aji yanglushir train atudaktsüra, asen lima nung akaba long kakteta aser alu tuteta item jagi sen akümtsü. Atangji, train ta asüdang, asenoki train nungji tsümar sünga mener atua Nagaland amokbangtsü amai bilemer, ajisüaka train nungji ILP check asütsü aser train station kima shia ILP reprangdak kishi aser süngküm alitsü. Aji oda, asenoki dang tsümartem nem talidak magütsüra parnok talidak makatsü aser mapa magütsüra meyipa aotsü aser marutsü. Tuli nung danga mesüra tzürangkong nung danga train station kaka ali asübo, India len nungi asenok asoshi aruba khubo item station-temji tonga arutsü aser teyokdanga kecha timtem melii asen lima nung asen meyong train station nungi yoktsü. Gari aliyonga aser tayimtsü nung senzüyonga, nisung olioratsü aser khu tulu aika abentsübo train aliba tetka maka. Jenjang kanga dalang aser khen nung khu tulu aika bentetter. Iba jagi nübortem ajangzüker aser nübortem ajangzükdaktsütsü asoshi government-i itemjibosa state kümer küm 60 majungdangsa inyaktsüla.