Nagaland Bandh takok ngua agiba aser CAB mebenoktetba atema pelar

Dimapur, February 13 (TYO): February 11, 2019 Nagaland Bandh timtem kecha melii agitetba atema Nagaland nung senso ajak nem tenüngsang agütsür, ta Co-ordination Committee-i metetdaktsü.
Maneni, district aser sub-division ajak nung administration aser police-i nübortem taginüba akhümtsübuba atema tenüngsang agütsür, ta parnokisa ashi.
Kanga dang ajungbena mokdang alitsü ayongaka aser volunteers shinga melemzüktsüaka, iba sentong takok ngua agiba ajanga asen külem Northeast state tem aser Centre sorkar dang Naga public-i CAB 2016 anemer ta jangjajangja sayuogo, ta parnokisa metetdaktsü.
Assam aser Manipur nung parnok külem BJP sorkaritemi magizükaka Centre sorkari Rajya Sabha nung iba bill benoktsü tekong meranga noktak. Ajisüaka, Manipur, Assam, Tripura, Mizoram, Nagaland, Arunachal aser Meghalaya nung public-i anema noktakba ajanga Rajya Sabha nung iba bill mebenoktet. Iba mapa tajung nung Naga nungertemia shilem agiba atema Co-ordination Committee-i kanga pelar, ta Media Cell sangdong ka nung ashi.
Northeast Region nung CAB 2016 anema yimdong nung lungkak aitba aser sentongtem agiba ajanga dang ashi, tebang agi dang magizüker ta ashi asü asübo Rajya Sabha nung zübazüba agizüker lila. Anungji, NE nung CAB anema len ania inyakba teloktem aser lungkak aitertemji NE nunger tarutsü kümzüka ayuba atema Northeast nung state sorkaritemi kanga pelatsü tim, ta Co-ordination Committee-isa metetdaktsü.