Total Dhamaal nung shilem magiba magizükteter: Ashish

Tsüklai/February 14, 2019 (Agencies): Total Dhamaal film ajungketba mapang actor Riteish Deshmukh aser Javed Jaferi nati iba film yangluba mapang nung actor Ashish Chowdhry maliba kanga menongraa bilemba lemsatepa liasü.
Chowdhry, shiba Dhamaal franchise nung mezüngbuba aser tanabuba film naprongla nung shilem agiogo pa film tasembuba nung shilem magi. Pa dang masü iba film tasembuba nung Sanjay Dutt-ia shilem magi shibai film anaprongla nung shilem agiogo.
Film indang jembidang Deshkmukh-i tawa entertainment website ka dang ashiba agi, “film yangluba mapang nung ni Ashish Chowdhary aser Sanjay Dutt naprongla kanga menongraa liasü, kechiyong ni taoba film ana tena den külemi tangoka liasü. Ajita shiaka ni script azüngba mapang nung tenaprongla iba film nung shilem mali ta meteter liasü.
“Ni set nung tenaprongla kanga menongraogo aser iba den külemi Anil Kapoor aser Madhuri Dixit den kanga jangradema inyakogo. Kasa mapang nung iba film nung jangrademtsü film aika lir,” ta paisa ashi.
Bodhbarnü Chowdhry-i Twitter ajanga Deshmukh aser Jaferi na nem telangzüba agüja liasü. “Ni nenok ajak kanga menongraa liogo @Riteishd. #TotalDhamaal nung shilem magiba ya agizüktsü tasak, saka iba ya kibong ka lir aser ni iba film ajanga record ajak raksatsütsü sarasadema atar, aji asünungdang asenok ajak film pezübuba nung külemi shilem agitettsü!! @duttsanjay sir, film nung aser film metangokba mapang naa kanga menongrar,” ta pai tweet asü.
Total Dhamaal ya Indra Kumar-i direct asü aser iba film nung Anil Kapoor, Ajay Devgn, Madhuri Dixit Nene, Riteish Deshmukh, Arshad Warsi aser Javed Jafri nungeri tongti shilem agir. Iba film ya February 22 nü sayatsü asoshi renema lir.