Bangladesh nung Khristan yimsü arur küm 500 jungogo

Chittagong, Tsüklai/Feb. 14 (Agencies): Bangladesh nung osangtajung sayutsüngitsü asoshi Khristan missionary tem tetsüng ajemoker küm 500 jungogo.
February 8 nü Chittagong yimti kübok Patharghata nung aliba Holu Rosary Church anasa Bishop’er kidang senden ka agiba mapang 1518 nung Portuguese Catholic shishilembartem mezüng arua Bangladesh nung amenokba bilemteta liasü.
Chittagong Archdiocese nungi Metropolitan Archbishop Moses M. Costa, C.S.C., ajanga jaokba ama Bangladesh nung Khristan yimsü arur küm 500 ajungba benjongtsü asoshi tamangba yimsü balala nungi nüburtem arua liasü.
Iba sentong nung Vatican ambassador to Bangladesh, Archbishop George Kocherry aser Archbishop Costa nati jembi.
“Yimjung aser kati ka den jungtepa alitsü ya tamangba yimsü ajunga indang tesayuba lir. Chittagong mesüra Bangladesh nung kisüng masü saka asenoki teti tesunep aser yimjung indang osang tesem ajaklen sangdongtsü meranger. Khristan yimsü kisüng masü saka asenok ajak yimsü ajak nung külemi alir. Iba yimjung aser tesunep ya temaba jenjang nung aliba nüburtem kisüng atema masü, ibai tsünglanglena lokti ajak nung prokshir. Nüburtemi yimsü indang ojang angateter,” ta Archbishop Kocherry-i ashi.
Archbishop Costa-ia kasa sentong nung jembiba mapang, “Küm noklang pongu süyiogo, tamangertem iba Chittagong ajanga East Bengal-i aru. Taoba küm asenoki sentong balala ajanga benjongtepogo. Asenoki Tsüngrem dak tashi taitba nung amangtsü asoshi sarasadem. Asenoki asenok ya tamangba yimsü indang kidanger ka ta sarasadem. Asenok tsüngta tesendaktep maneni alir,” ta ashi.
“Iba tatembang sentong ya tatem masü. Asenoki sensaker aser lokti nung timtem ajurur alirtem atema külemi inyaktettsü. Iba lokti nung tang tashi takar aser sensaker tsüngta timtem lir. Iba timtem nokdangtsü asoshi asenok külemi inyaktettsü – ibaji aseni Tsüngrem dang sarasademba lir,” ta Msgr. Costa-i ashi.
Iba sentong nung linük tesem balala nungi Catholic nunger 8,000 dak tali, priest 100, nun 120 aser bishop 10 den northeast India nung aliba Tripura state nungi Bishop Lumen Monteiro nungertem dena liasü.
“Bangladesh-i yimsü bener arur akhi missionary tem, tetsü-tebuo aser Tsüngrem dang pelar. Küm noklang pongu ogo, Khristanpur 600 dak tali yimsü mechi taküm tenlaogo aser century aika Khristan yimsü asen tenük agi ngua arur,” ta yangji alir Khristan lennir Mathew Corraya-ia ashi.