Iran bomb lendong nung Revolutionary Guard 27 asü

Tehran, Tsüklai/Feb. 14 (Agencies): Bodhbarnü South-eastern Iran nung taküm bendanga agütsür amakba lendong ka nung Revolutionary Guards züngsem tajemba agi 27 tepset aser 13 yiru, ta osang ajanga ashi.
Bomb pokloktsür yagi Pakistan den arrtsü anasa Sistan-Baluchestan province nung sepaitem bener aoba bus ka nung tenük yoker lendong ya agütsü.
Sunni Muslim nunger telungpur, Jaish al-Adl (Army of Justice) temi lendong ya agütsü ta shiogo.
Revolutionary Guards ya Iran nung kanga tongtibang military, political aser economic force ka lir aser parnokibo bendanger tashi aitsüogo.
South-eastern Iran nung aliba Revolutionary Guards branch ajanga ashiba agi, par ground force indang unit ka Bodhbarnü Pakistan den arrtsü len nungi meyipa shilangba mapang bomb sünga bena aliba gari ka Khash-Zahedan lenmang nung bus anasa pokdaktsü.
Sangdong ka nung parnoki ‘takfiri’ kiralongrar aser tashi tulu aliba linük indang itangitertem aitsü. Takfiri tetetzü ya Sunni nunger Muslim yimsü akhanga amanger dang ajar aser parnoki tanga Muslim nungertem ya mamanger ka ama züngshir.
Parnoki tashi tait linük ya balaka tenüng teta shia mali saka Iran foreign minister-ibo iba bomb lendong ya US-i anir Middle East atema Warsaw, Poland nung tang senden temendak alirtem den sendakteptsü. Iba senden nungya Iran-i region nung inyaksangshi indang onüktem jembitsü.
Küm aika tsüngda elite force dak lendong agüja aruba rongnung tang ya tesashitiba lir, ta osang ajanga ashi.
Revolutionary Guard ya Iran nung Islamic system kümzüka aser sepaitem nem teyari agütsütsü asoshi tenzük aser iba telok nung züngsem 125,000 shi lir. Iba telok nung ground force, navy, air force, itangiter aser special force lir.
Jaish al-Adl telok yagi Iranian Sunni nunger temeden asoshi 2012 küm nungi rara tenzük aser Shia nungertemi parnok mezüngmeshir ta ashishitepa arua liasü.
Iba telok yagi tawa Sistan-Baluchestan nung sepaitem dak lendong aika agüja aru, kong Sunni ethnic Baluchi kintem timba alir.
Ita tetenzüklen Nik Shahr nung sepaitem amenoka alidak lendong agüja liasü aser iba ya Jaish -al-Adl mapa lir ta aitsü, kong Revolutionary Guard ka taküm sama aser pongu yiru.
January tatemlena iba telok yagi Zahedan nung bomb ana poklokja sepai asem tashi yiruja liasü, ta parnokisa ashi.
Taoba küm October ita Mirjaveh arrtsü nung aliba Revolutionary Guards tem densema sepai 10 shi Jaish al-Adl teloki pua bener ao.
Iran south-western tsütsü aliba Ahvaz yimti nung September ita military parade ka nung lendong agüja nisung 24 taküm samatsü. Iba lendong ya Islamic State (IS) telok aser Iranian ethnic Arab separatist temi agütsü ta par sasa tenüng agia liasü saka telok katia kuli tejangja magütsü.