Modi sorkar agientsü atema onok longjemtsü: Rahul Gandhi

New Delhi, February 14 (Agencies): Taruba Lok Sabha election nung BJP anemba front ka tentettsü nükjidong nung opposition lenirtemi common minimum programme ka renemtsü atema telemtetba agiogo.
NCP Tir, Sharad Pawar’er kidang ayongzükba senden nung tang mezüng Congress Tir, Rahul Gandhi aser AAP tongti, Arvind Kejriwal na ajuruogo; iba denji külemi Trinamool Congress tongti aser West Bengal chief minister, Mamata Banerjee aser TDP tongti aser Andhra Pradesh Chief Minister, N Chandrababu Naidu nungeri India nung democracy kümzüktsü atema longjemer inyaktsü bangjemogo.
Iba senden tembangba sülen osangbenertem den jembidang Rahul Gandhi-i, common minimum programme ka renemtsü atema opposition party balala nungi lenirtemi telemtetba agiogo, ta metetdaktsü.
“BJP tamakok ngudaktsütsü atema onok senteper inyaktsü,” ta pai ashi.
Delhi chief minister Kejriwal-ia, iba senden takok ngua menogo aser opposition-i longjemer inyaktsü, ta metetdaktsü.
Iba senden ajanga, 2015 küm Delhi nung regional party-i sorkar tashi anguba sülen yimtenren nung anemteper party ana- Congress aser Aam Aadmi Party na lokteptsüa akok, ta temaitsü sayur.
Trinamool Congress Tir, Mamata Banerjee-ia iba senden junga agitetogo aser nüngdak dang süra election jakdang onoki lokteptsü, ta metetdaktsü.
Amalitepa inyaktsü atema opposition leniremi maneni senden ayonga amentsü, ta lai metetdaktsü.
Tanep Mamata-i, “State nung Congress den maneni raratsü. Linük jenjang nungbo onoki longjemer raratsü, ibaji ni züngbong ashir. Linük ajungtsü atema ni kü taküm aser party tenlatsü melunga lir. Ni ajak tenlatsü melunga lir,” ta metetdaktsü.
Telugu Desam Party tongti, Naidu-i, India kümzüktsü atema democratic takhangba lir, ta ashi aser National Congress lenir, Farooq Abdullah-i, iba senden junga agitetogo, ta metetdaktsü.