SKM pur block-level party office 7 semzükogo

Gangtok, Tsüklai/February 14 (Agencies): Sikkim Krantikari Morcha (SKM) tir P S Golay-i West Sikkim district, Soreng-Chakung constituency kübok block-level party office tenet semzüktsüogo, ta media osang ka ajanga metetdaktsü.
SKM pur sangdong ajanga ashiba agi, party office lapokba sentong ya nüburtem den sensaksemtsü nükjidong yur tongmelang agi agiogo.
Block-level office tem ya constituency kübok Karthok, Ridhang-Timborbung, Mangsari Magarjung, Budang aser Chumbong nung lapokogo, ta kasa sangdong ajanga metetdaktsü.
Sentepa aliba lokti sen den sensaksemba mapang SKM tir-i, Sikkim nung lokti amokbangtsü merangba sorkar anema nokdaktsü asoshi lokti temi shilem agitsüla ta ashi.
“Asenok amoa aliba nungi saktsüla aser ni nüburtem ajak dang caste aser creed dak ajemdaker masü saka Sikkim tarutsü asoshi vote agütsütsü mepeshir. Onoki 2014 küm mapang mejungaka kanga meranga toktepogo aser menden 10 tashi koktetogo.2019 küm election atemabo onok ket nung mapang aser rongsen lir aser tsüngrem aser nüburtem temoatsü nung tang yabo onoki akoktsü,” ta Golay-i ashi.
Chief Minister Pawan Chamling-i lokti bendanga amshir ta shia pai aitsü. Paisa ‘one family, one job’ scheme ajanga itasen ishika dang agütsür aser kasa mapang nung backdoor ajanga ita sen tulu anguba mapai nisungtem idaktsür, ta aitsü.
Iba amala ochimashi inyakyim ya tang aliba sorkar inyakyim tasen ka masü, ta pai ashi. Paisa SKM party-i sorkar kümtetba sülen anogo 100 tsüngda ‘one family, one job’ beneficiaries tem reguralise sütsütsü, ta tenangzükba agütsü.
SKM tir-isa parnok takhangba 35 ya February 25 tashi nung jangjashitsütsü khangogo.
“Onoki takhangba 35 agütsüogo, koba SDF party puri küm 25 yimsü asüba mapang nangzükbatem lir. Iba takhangba mataloktsüra February 28 nü Sikkim ajunga mokdanga ayutsü aser iba sülen longkak aitba sentongtem ayonga akatsü,” ta pai ashi.