Police officer Nipu Kalita pasasa bendanga agütsü

Guwahati, Tsüklai/February 14 (Agencies): Police Sub-inspector Nipu Kalita, shiba hon shibelener ket nungi hon auyar jena aoba sülen hopta ka shi samara liasü, pa Bodhbarnü Guwahati kübok Basistha Police Station nung bendanga agütsüogo.
Nipu Kalita ya Dispur Police Station nung inyaka liasü aser pai pa sasa bendang agütsüba sülen apu aser tang ken o tashishidak lir.
Temetettsükaji Guwahati-Shillong lenmang nung Nongpoh tesem nung meita aoba mapang shibelener ket nungi hon puteta liasü koba police officer yagi auyar ao. Iba hon ya sen crore 4 alang liasü.
Police officer den havildar Faijur Rahman aser home guard Afjal Ali na liasü.
Kasa mapang nung Nipu Kalita bendanga agüjaaka police temi tang tashi pai auyar aoba hon monguteti lir.
Nipu Kalita den külemi alisang ana; havildar Faijur Rahman aser home guard Afjal Ali na tang tashi mongui lir.
Meita aoba mapang police tem auer akümba ken o ajanga yimti ajunga anokshidaktsüogo.
Wahidur Rahman, Wahajuddin Rahman aser Ajmer Hussain nunger shirnok hon shibelenba nung densema liasü, parnoki Dispur PS nung February 5 nü Nipu Kalita aser pa den külemi alir ana anema ken o benokba sülenang iba osang ya jangjaa aküm.
February 5 nü ken o benlokba sülen nungi Nipu Kalita samara bushia aliba mapang pai Bodhbarnü pasasa Basistha Police Station nung bendanga agütsüogo.