EVM mamshitsü atema SC ajurua mepishitsü: Naidu

New Delhi, February 14 (Agencies): Supreme Court (SC) ajurua Electronic Voting Machines (EVM) mamshitsü atema mepishitsü asoshi BJP nung madenba party kari telemtetba agiogo, ta tanü Andhra Pradesh Chief Minister, N Chandrababu Naidu-i metetdaktsü.
Teleconference ajanga Telugu Desam Party lenirtem den jembidang Naidu-i, yasüng New Delhi nung Sharad Pawar’er kidang BJP nung madenba party 15 senden amenba mapang nung iba telemtetba agia liasü, ta metetdaktsü.
TDP-i taruba election nung EVMs mamshitsü aser Election Commission-i tanaben akhi ama ballot paper amshitsü atema takhangba aguja arur.
Anogo ana tejaklen Chief Election Commissioner (CEC), Sunil Arora-i, party timbakati EVMs nung melung alemer, saka party karibo aitsüteptsü atema EVMs tetshiba ya kanga tia maka, ta ashi.
TDP tongti, Naidu-isa party lenirtem dang, opposition party temi election jakdang lokteptsü aser common minimum programme ka renemtsü lemtetogo, ta metetdaktsü.
“Linük nung Narendra Modi’er yimsüsüba aikati anemer. Metemsüba nisungtem ket nungbo democracy ya lendong nung lir. Asenoki national party tem den jembishinüba takok nguogo,” ta paisa metetdaktsü.
Ajisüaka pai Andhra Pradesh nung TDP-i Congress den lokteptsü asü melokteptsüar ibajibo memetetdaktsü.
Congress-ibo parnoki Andhra nung Lok Sabha aser Assembly elections naprong nung tangar den meloktepi tokteptsü, ta metetdaktsüogo.