Tiyazü SC Certifacte atema Mukesh Kumar apu

Hyderabad, Tsüklai/February 14 (Agencies): Tiyazü Scheduled Caste certificates ajanga Indian Airlines nung mapa anguba atema Olympic asayamung nung asemben tashi shilem agisang aser taoba India Hockey team captain N. Mukesh Kumar den pa adianu anema ken o ka benokogo, ta Bodhbarnü police-i metetdaktsü.
‘Tahsildar’ (Executice Magistrate)-i ashishiba ken o nung ajemdaker, Kumar aser pa adianu Suresh Kumar na anema Indian Penal Code sections 420 (cheating) aser 471 (using as genuine a forged document) kübok FIR ka file süogo, ta osangbener dang Bowenpally Police Station Inspector D Rajesh-i ashi.
Kumar shibai taoba mapang Arjuna award agizükogo pa adianu, tenapronglai tiyazü SC ‘A’ Mala caste certificates yanglu aser state ajanga achaayangba Indian Airlines nung mapa ngua liasü. Atangji nungbo, tena ya backward class ‘A Nayee Brahmin” telok nungi lir, ta Inspector D Rajesh-i metetdaktsü.
Adianu ana ya SC community rongnung densema mali ta ashishiba osang angazükba sülen taoba mapang airlines-i iba ken o bushisüngdangtsü atema Hyderabad district ketdangser tem dang mepishia liasü.
Iba bushisüngdangba nung onoki maparen talila inyaka odar, ta D Rajeshi-i shisem.
Iba ken o nung telangzüba agüja, Hyderabad nung alir Mukesh Kumar-i, ni class 1 nung azüngba mapang nungi SC certificate yanglur liasü, ta ashi.
“Sports quota nungi Indian Airlines nung ni mapa angu,” ta osangbener dang Mukesh-i ashi.
International Hockey asaya 300 dak tema nung Mukesh Kumar-i ‘forward’ tajung ka ama shilem agiogo aser iba mapang pai goal 80 tashi idaktsüogo.
Mukesh Kumar-i Olympic Games asem; Barcelona (1992), Atlanta (1996) aser Sydney (2000) nung shilem agia liasü. Iba denji külemi Padma Shri award agizüker rongnung Mukesh ya ka lir.