Court memedemba ajanga Saina-i masayatsü lemtet

Guwahati, Tsüklai/February 14 (Agencies): Brehostibarnü Senior National Badminton Championship nung mepetmesü adoka defending champion Saina Nehwal-i court jenjang majungba ajanga masayatsü lemtet.
Olympic bronze-medallist Saina, shiba taoba küm tatemlen temein yirua liasü, la Sameer Verma tetsüng yirua masayateti tuguba sülen asayatsü liasü.
Pre-quarters nung Shruti Mundada den masaya tsüngda Saina-i court reprangdang aser masayatsü lemtet, kechiyong iba asayamung tembangba sülen la All England Championship asayatsü lir.
Badminton Association of India Secretary (event) Omar Rashid-i anir ketdangsertemi iba mepetmesü sülen iba ken o bentettsü asoshi yakta inyaktep. BAI ketdangsertemi Saina, Kashyap aser Sai Praneeth nunger dang nikongtsütsü asayatsü mepeshia liasü.
“Sindhu asayaba sülen court nung süng angena aliba khen anaben ka adok. Parnoki iba ya yanglushitsü. Onoki nikongtsütsü arua asayatsü,” ta Saina kinungbo aser külem asayar Parupalli Kashyap-i ashi.
Iba asayamung ya Assam Badminton Academy nung court asem nung asayadar.
Kashyap shiba tebur kija asaya pre-quarterfinal asayatsü arua liasü, pa aser Saina nati tanabuba court-a oa asadanga liasü.
Sindhu iba court nung anepdang asayar liasü. Lai tetsür kija asaya pre-quarterfinal nung Malvika Bansod straight-game nung kokogo.
Rashid-i ashiba agi, BAI-i court yanglushitsü aser Tarun Ram Phookan indoor stadium cement court tem nunga asayatsü asoshi anepalutsü.
“Court tesem kar memedemi kümogo aser ibayongji asayar asemi masayatsü lemtet. Onoki iba tebilemtsü bentettsü aser indoor stadium nung tanga arrangement agitsü,” ta Rashid-i ashi.
“Parnoki asayaner asü masayanerar aji parnok mulung. Parnoki nikongtsütsü pre-quarterfinals asayatsü mulungogo. Tanungba asayartem ajak pre-quarters aser quarters tanü asayatsü,” ta paisa ashi.