Rome nung fan tem dak kotari agi atsüng

UEFA Europa League playoff, Round of 32 mezüngbuba leg Lazio aser Sevilla na masaya tsüngda fan tem tsüngda mangatettep adokba sülen police temi tensa azüoktsü merangba noksa nung angur.

Rome, Tsüklai/February 14 (Agencies): Rome nung Bodhbarnü Lazio aser Sevilla fan tem tsüngda mangatettep adokba sülen parnok asem dak kotari agi tsünga liasü aser parnok asem rongnung ka kanga mejungi yirur lir, ta Italian media sangdong ka ajanga metetdaktsü.
Brehostibarnü UEFA Europa League match masaya tsüngda fan tem raratepba nung Spain nunger ana aser America nunger ka yirua liasü, ta La Repubblica daily sangdong ka ajanga metetdaktsü. .
“Ajak kanga süngjema liasü aser ajungbena onoki glass jaksaba ola angashi. Onoki kichiba leni asema oa reprangdang aser korang semer nisung telok kati süng bener tangar dak züka angu,” ta local bar kibur kati ashi.
Colosseum anasa Monti tesem nung mangatettep adokba nung nisung 40 shi densema liasü, koba police temi riot gear semer bendangja liasü, ta kasa sangdong ajanga metetdaktsü.
Gazzetta dello Sport daily sangdong ajangabo kotari agi atsünger parnok pezü mozüki nung temang anepalua aliba sangdongogo aser parnok rongnung British nunger ka kanga mejungi yirua lir, ta metetdaktsü.
Osang ajanga ashiba agi, iba rara nung kotari dena amshia liasü aser ashiba agi Spain nunger fan ka dena mejungi yirua lir aser America nungba yabo kangabo meyiru.
Kasa mapang nung Corriere della Sera sangdong ka ajanga ashiba agi, kotari agi atsünger rongnung kati komo nung amer teyari meshia yimtong süa ao.