KVGOA biennial conference Kohima nung kaogo

Kohima, Tsüklai/February 14 (TYO): Pei lima nung nütsüng yongsük ishiba akümtsü ana nung aliba lendong reprangteta Kohima Village Council (KVC)-i yakta parnok litsü nung Bangladesh nungi ozüng alema arua alirtem nem ki aser commercial building tem magütsütsü asoshi osang ka agütsütsü.
Iba osang ya KVC chairman Dr. Neiphi Kire-i Kohima Village Gazetted Officers’ Association (KVGOA) biennial conference mapang metetdaktsü, koba state yimtiba kübok Convention Centre, Kohima nung Dapfhütsumia Gazetted Officers’ Krotho (DGOK) puri ayongzüka kaa liasü. KVGOA ya 1991 küm tentet aser tang züngsem 434 lir.
Dr. Kire-i ashiba agi, ozüng alema bendanglen nungi arua alirtem ya manga ama renloka aoer aser iba ya lisopur atema lendong lir, anungji KVC puri yakta ozüng alema bendanglen nungi arua alirtem nem ki aser shishilembatsü asoshi kitem magütsütsü atema osang ka agütsütsü.
KVC ya apolitical lokti ka ta shia paisa, Council-i teti Naga nunger ajungtsü asoshi inyaktsü, ta ashi. Maneni pai Citizenship Amendment Bill anema yimtsüngi ola adoktsü mapang tongogo ta ashi.
Gazetted officer tem ya lokti nungitertem ta shia pai parnok dang lokti renloka aotsü nükjidong yur sentong aser inyakyim balala asadanga aser benoka inyaktsü ajungshi.
Paisa KVGOA züngsemtem longjema alitsü ayongzükba den telongjem aser tangatetep lira ajak koktettsü, ta ashi.
Kasa mapang nung Dr Kire-isa, KVGOA puri Kohima nung aliba nüburtem aser Naga nunger ajungkettsü asoshi inyakba asoshi parnok tenüngsanga liasü.
Ano pai Kewhimia Day taküm March 16 nü amungtsü metetdaktsü aser iba sentong takok ngua agitsü asoshi ajaki nungita yaritsü mepeshia metetdaktsü.
Kasa sentong nung o jembidang Kohima Deputy Commissioner Thejawelie Gregory-i, gazetted officer tem ya lokti atema cream ama lir ta ashiba den lokti lenla ajak nung renloka aotsü atema bendanga parnok akaba tajungtiba agi tenzüktsü ajungshi.
Paisa officer tem dang grassroot level nung nüburtem atema sorkar sentong aser facility balala dak sendakba nung nüburtemi parnok dang nungi imlaba ama inyaktsü asoshi ajungshi. Maneni officertem dang pai pei mapa bendanga agüja inyaktsü aser state kübok kinük nung aliba tesemtem nunga temulungsüa inyaktsü mepeshi.
DC-isa, lokti ken o balala; ali atsüngba, gari senzüsenpongtsü mesademba aser state yimtiba nung terenlok maparen balala dak sendakba nung KVGOA-i tongpoapur inyaktsü mepeshi.
Sentong nung nomination committee convenor Dr. Vilatuo Rutsa-i 2019 nungi 2022 tashi atema KVGOA team sangdonga liasü. 2019 nungi 2022 atema Dr. Vizolie Suokhrie tir, Zakielatuo Yiese tatongtir, Peter Phewhuo- tezülur, Neivotuo Keyho- senyur aser Er. Keviletuo Yiese advisor asütsü shimogo.
Association-isa NPSC nung takok angur parnok tenet pelashishia agizük.
KVGOA general secretary Medozhazo Rutsa aser senyur Kelhousinyu Solo nati iba sentong nung parnok report zünga metetdaktsü.
Iba sentong ya KVGOA tatong tir Menuolhoulie Suokhrie lenisüba kübok aka aser Khedi Baptist Church pastor Neisalie Keretsü-i sarasademer sentong tenzük. KVGOA tir Keviletuo Yiese-i tir o jembi aser Dziesekhrienuo Keretsü-i ken tajung ka aden. Maneni DGOK tir Dr. Khriesilie Sachü-i tepela anküp o jembia liasü.