JeM kiralongrartemi CRPF convoy amak; CRPF 40 pokset

Srinagar (Jammu & Kashmir), February 14 (Agencies): Tanü Jammu & Kashmir kübok Pulwama district nung Jaish-e-Mohammed (JeM) kiralongrartemi gari tilaka nung tapoktsü aika bener CRPF bus ka nung tsükokja amakba lendong nung CRPF sepai tajemba agi 40 poksetogo, ta ketdangsertemi metetdaktsü.
Central Reserve Police Force (CRPF) sepai 2500 shi sodi agiba sülen tanaben duty nung join asütsü atema convoy gari 78 nung Srinagar-i meyipa aruba mapang nung Awantipora kübok Latoomode nung Srinagar-Jammu highway nung kiralongrartemi amak.
Police-i ashiba agi, gari nung tapoktsü jenti bener taküm tenla agüja amaker kiralongrar sangji 2018 küm JeM telok nung adensang, Pulwama nungi Adil Ahmad liasü ta jangjaogo.
Kiralongrartemi amakba aija Ato kilonser, Narendra Modi-i, sepaitemi taküm tenlabaji amajok masütsü, ta metetdaktsü.
Ato kilonseri twitter ajanga, “Pulwama nung CRPF sepaitem amakbaji aitsütsü tetemsü. Tasümait mapa ya ni sashia aitsür. Asen tasütait sepaitemi takum tenla agutsübaji amajok masütsü. Taküm tenla agutsür sepai kibongtem den linüki mangyimer. Yirua alirtem tekaraba nung taneptsü ngudakjang ta sarasademtsür,” ta lemsatep.
JeM teloki parnoksasa parnoki amak ta nangzükogo.
Srinagar nungi kilometer 30 shi pilar aliba tesem nung atalokba lendong nung nisung 20 dak atema yiruogo. Tapoktsü bena aliba gari-i tsükoktsüba bus ji anüka ajensa aser tanga bus-a aika raksaogo.
Osangbener den jembidang CRPF DG, RR Bhatnagar-i, “Gari convoy ji aika liasü aser gari balala aika nung sepai 2,500 shi mena liasü. Convoy dakji injang-a khaloktsü,” ta metetdaktsü.
Convoy ji tanep 3:30 ako meta Jammu nungi apuso aser tanü anü maidangsa Srinagar yimti atongtsü liasü, ta parnoki metetdaktsü.
Tsüngsang majungba ajanga tesüiba anogo ana-asem iba highway nungji gari mesenzü, ibayongji tanü Kashmir-i aoer sepaitemji aika liasü. Teti agia convoy ka nung sepai 1,000 shi dang senzür saka tanübo convoy ka nung sepai 2,547 liasü.
Gari lenmang anükba party ka nem mapa lemzükja liasü aser convoy nungji armoured counter-terror garitema liasü, ta ketdangsertemi ashi. Iba lendong atalokba sülen tang iba tesem nungji Forensic aser bomb analysis team-i bushisüngdangdar.
Tanü amakba bus nungji sepai 44 shi mena liasü. Kashmir nung CRPF inspector general (Operations), Zulfiqar Hasan-i, iba lendong ya gari amshia amakba lir aser Jammu & Kashmir Police-i iba tatalokba bushisüngdang tenzükogo, ta metetdaktsü.