NESO tenüng asangtsüla

Centre sorkari Lok Sabha nung Citizenship (Amendment) Bill 2016 benoka agizükba sülen Rajya Sabha nung iba Bill benoka agizüker ozüng küma yanglutsü atema kanga merangdang saka iba alizüngji metongteti tembangogo. Centre nung BJP-i aniba sorkari 2016 küm CAB benokba sülen Northeast nung kija aser telok aikati iba Bill magizüki ashishitep aser sorkar dang Bill meyipa agientsü atema takhangba agütsü tenzük. Telok aika liaka CAB anema yakbang ser inyakba telokji North East Students’ Organization (NESO) liasü aser parnoki tetenzük nungi tatem anogo tashi kanga dang meranga CAB anema mapa inyakba ajanga takok tulu ngutetogo. “Delhi-i masü saka onoki onok sasa ozü tarutsü tia yanglutsü” ta NESO-i shia mapa inyak aser iba ajanga tatem nung Northeast nung lisopurtem asoshi takok tulu bener aru. NESO-i northeast kübok parnok kübok züngsema aliba kaketshir teloktem den amalitep tajung yua aser telemtetba tajungtem agia aruba ajanga Northeast nung lisopurtemi Citizenship (Amendment) Bill 2016 magizüker ta sayutsüsa January 8, 2019 nü Northeast Bandh takok ngua ayongzüka agi. NESO-isa Shiv Sena, Congress (I), SP, BJD, TMC, DMK, SAD, NPP, AGP,TDP, BPF aser tanga political party aika den ajurutepa CAB anema noktaktsü ayongzük aser iba mapang telok balalai CAB anema vote agütsütsü ta nangzükba asenoki osang angazükogo. NESO ketdangpurtem New Delhi nung oa mungzüker, anibelem arema, kanga dang nendaka aser bendanga agüja mapa inyakba ajanga Centre sorkari Rajya Sabha nung CAB mebenokteti Parliament session tembangdaktsü. Lok Sabha nung agizükaka Rajya Sabha nung magizükba ajanga CAB 2016 ya June 3, 2019 nungibo mali kümdaktsütsü. Northeast nungi CAB anema mapa tuluba inyakbaji Meghalaya Chief Minister aser National Peoples Party (NPP) president Conrad Sangma lir ta nisung kari züngshir aser pa nem tenüngsang agütsür saka asenoki CAB anema mapa inyaka aruba meyipa reprangdangra, mapa tulutiba inyakbaji NESO asütsü. Hao, Conrad Sangma-ia mapa aika inyakogo saka pai Asom Gana Parishad (AGP)-i CAB anema lemtetba ama pai BJP denbo tesentaktep mepila aser pa yakbang ser CAB anema inyak nunga tanüngba NE chief minister tem aser political party tem-a lir anungji pa dang dang jokteta ‘NE Hero’ ta tenüng jaloktsübajibo tim masü. Rajya Sabha nung CAB mebenokteti Parliament session tembangaka, ano NESO-i Centre sorkar dang Foreigners’ (Amendment) Order, 2015, Passport (Entry into India) Notification, 2015 aser India semdangi arur Bangladesh nunger nem long-term visa agütsüba inyakyimtem agienang ta takhangba agüja lungkak aittsü ta sangoktsüogo. Iba ya Northeast nung lisopurtem atema osang tajung lir aser kanga dang rongdak nüngdakba onüktem lir. NESO-i tetshiba ozüngtem aser inyakyim ya Northeast nung aliba lisopurtem asoshi lendong keta lir aser item ya agientsüla, mesüra tarutsü anogotem asenok item ozüng aser inyakyim ajanga timtem ajurutsüsa. BJP-i Citizenship Act, 1955 meyanglushiteta Foreigners’ (Amendment) Order, 2015, Passport (Entry into India) Notification, 2015 aser India semdangi arur Bangladesh nunger nem long-term visa agütsüba inyakyimtem ajanga asenok nem maneni tebilemtsü aser khurettem bentsür arutsü. Anungji, NESO nung züngsema aliba teloktem- Khasi Students’ Union (KSU), All Assam Students’ Union (AASU), Naga Students’ Federation (NSF), Mizo Zirlai  Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) aser All Arunachal Pradesh Students’ Union (AAPSU) ano tali longjemshir ola adoktsüla. Talisa, NESO-i tarutsü dak rangloker mapa tajung inyakba atema Northeast nung lisopur ajaki tenüngsang agütsütsüla aser parnoki anir inyakba mapa nung posema yariteptsüla.