Akho Amungi Atu

– M. Meren Ex.Pastor Ungma.

Khen mapang ka nung tantsür ka aso tulu ser tebor kanga tajung ka aiür chanu kati ajuru, anungji aiür chanula jagi tantsüla dangji asüngdang, otsü nia ner dangi AMONGI atutini?. Tantsülai ashi, haini semchir, otsülar kidang nai mongnü tashi mongangma. Anungji aiürlaji pelaseta tantsülar dang jagi kenü amongi tua among. Ta tsürabur shin O ka nung jembia aru. Aser ibaji Akho Amongi atuba ta otsü jembia aru.
Süngdong tulu nung kongsang sangshia oa alidak Shisang Koyai Akhojang mengumer tua süngdong kongsang nung mener ibaji chia kazür, ano Ozütemia kasa Akhojangji mejir oa kongsang nungji temer aji chia kazür, yamaji Shisang Koya aser ozü sangnütemi süngsang nung aser songpok nung Akho jangji chia kazür iba tejangji tokshia yutsür oa adoker aser iba tejangji tanem tanemi tila ka meia songpok aser kongsang nungji tera ayanger aser tanem tanemi süngdong kümteta ainer. Aser oda oda la amongba süngdong tuluji amokseper aser aroa shirepdaktsür aser iba shirepba jagi Akhoji mol tajung kümer tesüngmangtsü olua ainer aser mezüng Sungdong to tila kata mekai amokseper, iba dangji AKHO AMONGI ATU ta jembia arur.
Onok lanuwa leper anasa alongtong süngdong tulu ka liasü, aser iba nungji Alongjang jenti tanga onoki ibaji tazüng nung tsüka akabaji shia chiasa aru, yamaji Alongjang atangba jagi onoki iba süng dangji ALONGTONG ta ajar. Iba Along süngji lenoka arang nung cft noklang anabo rangtetsüsa tulu liasü. Iba mapang nungji onoki iba Alongtong kongsang nungji AKHO süng tila ka meia aliba ajibo Akho meirana? Tasa jembi, oda oda onoki ngua iba Akho süngji tongshi teka ain, aser idangji Alongtongji tera kongraa aküm, saka küm ishika tsüngta nung iba Along süngji mekai aküm aser Akho süngji tesüngmangtsü olua aküm. Tang Ozü yimdak Akho tong tuluba aser atura süngdongji ibaji kümer lir, aser Alongtong jibo tazüng nung süngmetak tila kata mali kumogo. Yamaji Akho Amongi atuba tatalokbaji onoki ngua aru.
Kenü sentep tulu ka nung Senior Pastor tajung kati Tsüngrem o kanga junga jembi aser pai Akho amongi atuba indang onük nungji bener aru aser kanga putepa jembi, saka ni anga ali nung pai Akho LUMONGI ATU ta jembi, ashiko niang angapet asütsüa akok saka ni anga ali nung anaben asempen tashi Lumongi atu ta jembisem. Saka Lumongi atu aser Amongi atubanaji kenyongi balala lir, Amongi atubajibo tetsü-tebu kidangi amongi aoba, saka Lumongi aobajibo nisung ka kija alui aoba, mesüra ka kija mapai aoba, mesüra apunina kisüng alui aoba, Lumongi aoba anungji anaji balala ta ni lanur nem angajemdaktsütsü asoshi ibai shisemer.
Naga lima nung AKHO amungi atuba Akhotong tulu ana kongsang sangshia aoba agi Naga lima Anüdok tip kelen nungi Anülu tip külen tashi Akhotong süngsang sangshia aoba agi Naga lima ramoka kodanga tongzen (Tashi) makümtsüsa Molu nungi tera yanger atuba agi Naga lima amoksepogo. Iba Naga limai Akho Amongi atubaji kechi?.
Kodang British nungeri India lima toktsür aotsü mapang tonga aru idangji Naga nunger lenirtemi onok Naga nungertembo nenok arudang onok koda pei sasa yimsü süa liasü yamaji tang tokjang ta Simon Commission January 10.1929 nung Kohima tonga arudang Naga nunger lenirtemi ajang ajanga ashi. Saka kodang British nungeri India toktsür ao idangji Naga nunger asoshi kecha jenjang tajung kata melatettsüi India nunger nem Naga limaji toktsür ao, anungji iba mapang nung jagi Indiai asenok Naga limaji par kübok ayutsü kanga merang aser tasa tapu tapu agi Naga lima azüoktsü merang, saka makok nung India Army ozüng tesashi bener atua azüoktsü merang saka makok, anungji yim pezü pungu lokteper atsü tapu asem agi shibanger kar ita 10, kar küm ka aser karbo talia shibanga ayu, ibaji Yihuda nunger Babilon lima nung alar tia nung shibanga ayuba dang nungi tamajungba tia nung ayu, aser yimtok ajakji temshia tsük jen tena rongtoktsü, kisangkir nung ka ana anunga akaba ajak pushia rongdoktsü, Naga nunger tia aiataiji iba mapang nung lisemeri dang metet. Saka iba jagia Naga nunger molungjang manokshi, anungji Naga nungertem ya kecha agia makoktsü ta Indiai ajitet, kechiaser nüchi tia bushir Naga Armytem kasetbajibo par o par na raradang asürji aji tim dang saka yimdaklir kangshibaji tebang agi rasa meshiteter, Armytemi rishikangshia aliba dak tenük agi mokok ranglok, aya-tzüra nung metemji süma, saka nüchiso aginüba nung temolungjang manokshinungji Naga nunger azüoktsü asoshi Centre nungi AKHOJANG ana bener atu aser aji Naga lima nung zünga yutsü. Anungji iba Akhojangji ina Naga lima ajak akhumbanga olua olua ramoka aküm.
Süngdong tulu süaka la dangi Akho amongi atutsü mela nung iba jagi mezüng süngdong ajak amoksep, Naga lima azüoktsü asoshi nok nü agi makok, bomb agi makok, ayawara agi makok, rishikangshi tapu jendi agi makok nung Naga nunger azüoktsü asoshi Yi talubusa yokdi ta lemtet aser Dimapur nung Yi yangludak Factory amenok, Yi Dokan lapoktsü District ajak nung Licence jenti agütsü, aser lemjem shia nung yi dokan talubusa lapok, oda Naga lima sünga yi ayong ama ayim. Iba mapang nungji Naga nungertem tulu tila ajak yi bottle azür tesem ajak nung mangazüa jajar timba, lemjem shia nung aser nala ajak nung saktsü agi pelongpanger atura nisungtem süjen ama merepshia akaba ajurua aruogo.
Anungji Naga nunger ya majungtsü ta NBCC-i (Nagaland Church Council) anir Mungdang ajak longjem aser iba nungji Local Arogo aten ta ser lumia sarasadema Sorkar dang yi shibangang ta akangba Sorkari bilemdanger Khristantemi akangbaji agizüka Nagaland nung Yi nokdangtsü ozüng renem aser 1989 June 26 Hombar nü Nagaland Dry State kümdakja sangdong. Saka Nagaland nung Yi Akho amungi atubaji süngsang tajung nung amenoka yur tera yangdaktsü asünungji Akhoji tuluba tuluba ina atu, aser mezüng sungdong to amoksepa kümdaktsü, anungji tanü joko christantem to 80% percent yi ajemer lir. Ano nisung 10 asü nung 8 bo yi agi jemsetba ataloker aser parnokji arishi küm 40 majung timba ibaji ajaki hau ta shitettsü.
Naga limai Akho amungi atuba, la amungba süngdong to jungjunga amokseper oda jungjunga aroadoker temonga maka kümogo. Saka Akho amungi atuba süngdong to tuluba tuluba küma kongsang asangba agi Naga lima ajak amoksepogo, aser joko lai amokbanga ayuba Akho kübok temtsüng nung kecha sünga memeyir oda laji dang Naga lima nung meren merena amenoker talang nungia Naga lima to Akhotongang akümno ta penzür. Anungji NBCC-i iba Akhotongji lentokdi ta lemteper Pu techira bener arua Akhotongji naidanga reprangtep nung joko pu agi alentsüsa masü, saka anüng nungi tsüngi arua AKHO tong dakji ayiloktsü nung dang aroa adoktsüla, anungji Akhotongji toktsür NBCC lenirtema senshiogo.
Ano NBCC kübok Mungdang 21 dak tali lir südi, saka ni jangja memetet saka item Mungdangtem jagi AKHO tongji lentoktsü osang agitep, saka parnok madak tulubaia makok nung asenoki kechi inyaktettsü ta per ngur nokbang tatsü aküm ama atsüoka toker pei kidangi senshia ogo, aser joko ola adoker mali azüngmeyaka kümogo. Kechiaser Mission field nungbo Akho amungi atubaji maka anungji Akhoi amoksepbaji parnokibo jangja mangur, anungji aji timtang.
Mungdangtem kübok Local Arogotem mezüngdangma lir, item Arogotem shia jagi Naga limai Akho amungi atuba yagi Naga lima ajunga, yimtsüng ajunga, Arogo ajunga aser Khristian kibung atepzüng tashi amokbanga aruogo, anungji NBCC aser Mungdangtemi Akhotongji melentoktetra Local Arogoi tanga lentoktsüato ta Kowya mungdang nung bangtsübangjonga, molungsua jembia Tanü tekong nung tsüngtsüngji azüktsütsü jembitep, kechiaser Akho amungi atuba agi Local Arogo amangbapurtem ajak amokseper anungji Arogoi aji ajia melitet nung aser par nütsüng tesümar anungji mapa kabosa inyaktsüla ta lemteper Tanükong nungji tsüngtsüngji azüktsütsü kanga molungsua lemtet aser ajaki aji tesüngmangtsü ajungtsüa, iba jagi asenok ajak kümzüktsü ta Arogoi yongrakji zemshia araktsü lemtets. Ska Arogo yongrakji KOR yongrak dang asü nung shinga alena meyutet aser Local Arogo tsütsüi AKHO süngsang ka sanga arubajia melentoktet, kechiaser Arogo KOR yongraji shingaia hau ta züngshia mali.
State nung temaba menden nungi tenzüker yimtsüng yimsüsür tashi nung yi majemerbo malitsü südi, ashiko karbo majemera alitsü akok saka yi nungi jenboa alirtembo züngteta dang alitsü südi. Ozüng abenertem teka jilatokerji Naga lima ramoka akaba Akhotong tuluji alentsü parnok ket nung nok techira kata nokleptsü nung sema mali, parnoka tebang agi jembir tang ashi nok techira sema mali nung Akhotongji satem satema gate atenteter, aser tesem ajakleni kongsangji sangshia aor, saka tesem tesem nung taportemi sota rakzüka ayur aser mirijang metsü-semer fine ser chioker, ano kenken yimtsüng yimsüsüri tayokertem bushia or mirijang metsü-semer fine asür saka tayokertem dang Lakhsa Lakh fine asübaji parnok yi abenertemjibo hiki kadanga takoksa mali, kechiaser yi pungdang ka nung tzü litter pungu-terok shioker yi pungdang ka agi pungdang pezü pungu küma yanglur aser ano pungdang shia senbo tesüngmangtsü raketa tur ayoker aser sen jenjangji raketa atu yonga kechiba jenjang yamai sashia atur ta masüngdanger, Petrol companytemi totzü nung poisa 20 tur ayok nung alima ajak asateper aser Longkak aiter, saka kodanga yi dak jenjang atuba atema lokti longkak aita jajaba mangashir, jenjangji komaka sakdir sakaka pelaseta alia ajemer, yi ayoker dang fine asüba sentsü ajakji nüpur temisa yi ayoker sentsüji menoktsütsü asoshi amoia moteti anüpungi saker senbong to atsüzüka semer yi ayoker kidangi asemteper. Anungji yi ayoker dang yimsüsüri fine asüba noksenji poisa kata maka, kechiaser yi ajemerji noklang nung 80% lir item jagi yi ayoker dang fine asübaji kenü yongi menoktettsür.
Tsürapurtemibo ki anasa kodanga AKHO matem, kechiaser la sentsü kanga dang tasong aser lai la anasa aliba nisungtemji ajak amokseper. Ano AKHO tera jagi kodang nisung aliba kimongji tonga yanga arudir ki kiburji atsüngtoker aser kiburji ari mashi süadoker ta jembir, iba jagi ki anasa AKHO matemer ta jembia aru. Ano Akho süngbo asangur mesüra tanuburtemibo kodanga matemer, saka tamburtemi dang atemer ta jembia aru, kechiaser la sentsü kanga tasong asü nung Akhoji aindang iba süng atemsangji ari mashir ta jembia aru aser aji shitak ataloker ta amanga aru. Saka tanü asüngbo aier-asangurtem aser tanuburtemi dang AKHOji atemer aser AKHO teraji par ki tashi ali nung pelema atudaktsür anungji tsüraburi jembi ama AKHO atemsang to sümaogo, ki tazüng timba, Naga lima aiatai kümogo.
AKHO amungi atuba amaji Naga limai yi atubaji AKHO amungi atuba den saku lir, taküma yim shia nisung kwi asü aji asadang nung noklang nung 80% percent yi agi jemseta asüba adoker. Aser ano tang taküm anunga alir aturapurtem süngdong süngtoh atuba agi sungu tu morumorua aroa adokba amato nisung sentsü mali, tero mali, tejak mijang ama naker, kümkümküma jajar mali, saipi timba jajar, tenük metongi oadoker Ango nük ama meremer mangazür, itemji kopika arishia alitsü? anogo maka, item jagi kibong takar küma otettsü no? item jagi chirnur tazünger tajung koda yaritettsü? Item jagi Naga lima nem tajangzük agütsütsü no? item jagi Arogo kodika nungettsü? item dakji tarutsü mangdang yutettsü no? Naga lima asoshi tarutsü mangdang ajak sama odagi, Naga lima tarutsü generation ka samatsü anasa lir. Tanü Naga lima yimtsüng shia nung atura AMITSUR mezüngdangtet kümogo, kechiaser kinungbur atura dang jemseta sümar anungji temeimtsü kinungtsür tajung dang Amitsür tesa kumogo. Pei kinungtsür ashioktsürtem Tebu Yihova Tsüngrem tsüngdang tepela nung ken tentepba alitsü, asenoki pa asünü mangjak nung pa tepeladaki ogo ta mejembir no?
Alima mezüngbuba rara adokdang asen Nagaland nungia Saab nungeri Dawai kin shia kar noklang pezü, kin kar noklang anana, kar asem ta aja, anungji kin shia tashikartem yimtsüng shia nungi shimteter anir ao, parnokji tzüyim tuluba ajanga alima kin aika ajanga France lima atong, aser kodang tongpang raraji takok tulu ngua atem Dawai aortem ajak France lima nungji atenshia mapang talangka anisüngzüka among, saka par lima ajak nungji war nung tebur ajak süma kechiaser war nungji tebur ajak Sepay kümdaktsür rarai anir ao, anungji teburtem par lima nung kata mali aküm, kibong kümer alirtema kinungbor ajak asü, asangurtema ajak süma ta ser Saabtsürtem, Francetsürtem temeimtsüka ajak amitsür aküm. Kodang Wari aortem Sepaytemjia tasür ka süaka tanungbapurtem joko meyipba aotsü mapang tonga aru aser apusutsü ozüng agütsü, aser Naga nunger Dawai arurtemji ajak atenshir pei limai meyipba aotsü metetdaktsü. Idangji Francetsür amitsür aser aiürtem jagi sepaytema aika suta ayu aser Dawai aortema aika suta ayu aser ana alitsü anungji modaktsütsü ta nüktzü yima sot anungji aika pei limai marutet ta tsüraburtemisa jembia aru. Tanü tensa nung Naga lima iba tiaji ajurutsü südi. Saka asenokbo War nung sümaba masü saka Naga limai Akho amungi atuba kodanga meyipba maotsüsa Akotongji kanga olua kümdaktsüogo, anungji iba jagi Naga nunger asangur tajung ajunga, kiyim lanu tajung ajunga, amoksepaogo, anungji Naga lima nung war maka azü tokshiba maka ser sümaba agi yimtsüng shia nung tashikar tebur apuapua kema leperi omaogo, anungji amitsür temeja anungtendagi, anungji Naga lima memenui generation ka tebur agi kanga anunga akümtsü.
NBCC-i kanga merangaogo, Mungdangtemi tesüngmangtsü merangdangaogo, Local Arogotemi tanen maka merangdangaogo aser Ozüng amertemi, merangdangaogo, saka tanü tashi nung kecha nunga takokba mali, anungji tangbo Nagatsürtemi mapa ka meinyakra asenok tetsürtem asoshi aiatai tia ajurutsü ana nung lir ta tarutsü Naga lima tia ngua asüng lanu putu asoshi kanga shisabuluja bilemer. Saka asenoki tamakok nungji dang merangloki tarutsü teyimla nung rangloker mapa inyaktsüla, ajiang England samatsu ghonda ishika lia Englandtsü longjemer lumia sarasademba ajanga Germany ket nungi kümzükba dak ranglokang, aser Laishiba nung tetsüri tebur kümzüker ta aliba Tsüngrem oji züngang sürabang asen Naga lima teburtem kümzüktsü Aotsürtemi kishi tulu lapoka angutsü.