Opposition ajaki security forces aser sorkar nungiter: Rahul Gandhi

New Delhi, February 15 (Agencies): Yashi Pulwama nung kiralongrartemi CRPF sepaitem amakdang sepai 40 asüba sülen iba dak sendakba nung tanü Congress Party Tir, Rahul Gandhi-i par party aser opposition ajaki sorkar aser security forces nungiter, ta metetdaktsü.
Tanü New Delhi nung osangbenertem senden ka nung jembidang Rahul Gandhi-i, “Tesempa aser tejashi agi India nunger temeim meraksatsüatettsü,” ta metetdaktsü. Osangbenertem senden nungji taoba Ato kilonser, Manmohan Singh, Congress lenirtem- Ghulam Nabi Azad aser A K Antony nungera liasü.
“Iba ya kanga mejungi maakogo, iba ama rara ya tejashitsüka. Kiralongra ajanga linük nung telemsa adokdaktsütsü meranger, tashi ajanga onok tsüngda telemsa madokdaktsütettsü. Opposition ajaki security sepaitem aser sorkar nungiter,” ta pai metetdaktsü.
“Iba mapa inyakertemi panoki linük raksatsütettsü ta mebilemtsüla. Iba ya mangyimba aser tejashi mapang ka lir,” ta paisa shisem.
Manmohan Singh-ia, linüki kiralongraji magizüktettsü, ta metetdaktsü.
Ano külen tanü Congress lenir aser Punjab chief minister, Amarinder Singh-ia, Pulwama nung CRPF amakba atema Pakistan nem tapet meyiptsütsüla, yimjung mapang süiogo, parnok dang lesson ka sayutsü mapang tongogo, ta ashi.
Punjab tatar senden nung bangzüng ka renemtsü benoka pai, Pakistan-i masayatsü asayar, par Ato kilonseri (Imran Khan) yimjung atema jembir aser kulenbo General-i (Qamar Javed Bajwa) raratsü atema jembir, ta ashi.