Northeast longjemer CAB anema noktaktsü: Mizoram CM

Aizawl, February 15 (Agencies): Centre sorkari Citizenship (Amendment) Bill tanaben benokra Northeast nung political party, NGOs aser civil society ajak longjemer anema noktaktsü, ta Mizoram chief minister Zoramthanga-i ashi.
Zoramthanga ya Mizo National Front (MNF) nung president lir aser paisa nübortem, NGO, arogotem aser political party ajak dang Parliament nung CAB benokra longjemer noktaktsü atema mepishia metetdaktsü.
Northeast India nung nübortem aser telok ajaki anema noktakba ajanga Rajya Sabha nung CAB mebenoktet, ta paisa shisem.
Mizoram NGO Coordination Committee (MNCC)-i Republic Day mokdangba den külemi Mizoram ajungalen lungkak aitba sentongtem ayonga agi.
Iba maparen nung MNF aser Young Mizo Association (YMA) teloktemia tongti shilem agi.
Külen, Tripura nunga tawa tasen tentetba Movement Against Citizenship (Amendment) Bill (MACAB)-i Hombarnü Agartala nung takok anguba rally ka ayongzüka agitsü.