Kiren Rijiju-i Congress aitsür

Guwahati, February 15 (Agencies): Congress-i Northeast nung refugee tem lidaktsü aser ozüng alema aruba Bangladeshi nunger parnok indang vote bank kümdaktsü ta Union Minister Kiren Rijiju-i aitsü.
BJP aser NDA sorkari akokba tashi Northeast nung lisopurtem oshi aser sobalibatem kümzüka ayutsü ta Rijiju-i ashi.
“Congress-i aibelena refugee tem lidaktsüba aser Bangladesh nungi ozüng alema arurtem parnok indang vote bank kümdaktsübaji kangasa tamajung lir. Onoki iba inyakyim joko meinyakdaktsütsü” ta paisa ashi.
Union minister of state for home Rijiju ya Arunachal Pradesh nungi lir aser iba state nung taoba Congress sorkari Chakma refugee meyirjang aika anioka lidaktsür ta tai tongloktsür.
Chakma nunger ya Bangladesh nungi aruba lir aser Arunachal Pradesh nung lisopurtemi parnok lidaktsüba ya magizüker.
Assam nung küm aika ozüng alema aruba tebilemtsü agi timtema arur. Putu 20 buba tenzükba mapang ka nungi Bangladesh nungi nisung aika Assam nung arua alir.
Iba tebilemtsü atema 1979 nungi tenzüker küm 6 tashi AASU-i ozüng alema arurtem jangjatsü aser parnok meyipa yoktsü atema takhangba agüja lungkak ait.
Iba ajanga August 15, 1985 nü Assam Accord sign sütep.
Ozüng alema arurtem indang tebilemtsü ya Northeast kübok Meghalaya, Nagaland, Mizoram, Manipur aser Tripura nunga lir.