PM Modi-i India nunger train tekeratiba Vande Bharat tenzüktsü

New Delhi, February 15, 2019: Tanü New Delhi Railway station nung Ato kilonser, Narendra Modi-i India nunger semi-high speed train- Vande Bharat Express tenzüktsüba noksa nung angur. Iba train ya Delhi nungi Varanasi tashi senzütsü.

New Delhi, February 15 (Agencies): Tanü Ato kilonser, Narendra Modi-i India nungeri tang mezüng engine meketi yangluba train- Vande Bharat Express, New Delhi Railway Station nungi tenzüktsügo; ajisüaka yashi Pulwama nung kiralongrartemi sepai jenti tepsetba ajanga pa dak tepela jakden maliasü.
Vande Bharat Express train ya New Delhi nungi Varanasi (Uttar Pradesh) yimti tashi senzütsü. Iba sentong nung jembidang Ato kilonser, Modi-i, yashi amakba ya India-i sashia meyiptsütsü, ta metetdaktsü.
Iba sentong nung jembidang Railway Minister, Piyush Goyal-i, “Pulwama amakyonga Vande Bharat Express tenzüker, koba ajanga kiralongrartem nem tapet meyiptsür,” ta ashi.
Tawa Railways-i linük nung yangluba Train 18 dang Vande Bharat Express jaloktsü. Semi-high speed train ya New Delhi aser Varanasi na tsüngda senzütsü aser ghonda ka nung tekaraba agi kilometer 160 senzütettsü.
Coach 16 aketba train ya sen crore 97 indoka ita 18 agia Uttar Pradesh kübok Rae Bareli nung Integral Coach Factory nung yanglu. Linük nung tang mezüngbuba locomotive-less train yagi küm 30 tashi tamshidak Shatabdi Express melenzüker.
Air-conditioned train ya Delhi aser Varanasi na tsüngda senzüdang Kanpur nung khen aser Allahabad nunga khen, ta anenzüktsü. Train nung WiFi, GPS-based passenger information system, touch-free bio-vacuum toilets, LED lighting, mobile charging points, climate control system alitsü.
Iba train tickets telemsa ana alitsü. Railways-i AC chair car ticket ji jenjang sen 1850 aliba nungi 1,760 tashi ajemtsüogo aser executive class ticket jenjang 3520 aliba nungi sen 3,310 kümtsüogo.
Varanasi nungi meyipa arudang chair car ticket ji sen 1,700 asutsü aser executive car ticket ji sen 3,260 asutsü, ta Railway ketdangsertemi metetdaktsü.