Home Minister den J&K Angh-i asür sepaitem nem akhüm agutsü

Budgam (Jammu & Kashmir), February 15, 2019: Tanü Budgam nung aliba CRPF camp nung yashi Pulwama nung nung asürtem nem akhüm agutsüba sentong ka jakdang Union Home Minister, Rajnath Singh aser Jammu & Kashmir Police Director General, Dilbag Singh nati CRPF sepai ka indang tasümang süngden apur aoba noksa nung angur.

New Delhi, February 15 (Agencies): Tanü Jammu & Kashmir nung Union Home Minister, Rajnath Singh aser state Angh, Satya Pal Malik nati yashi kiralongrartemi amakdang asür CRPF sepai 40 nem akhüm agutsüogo.
Rajnath tanep Srinagar tonga oa liasü aser tanü Jammu & Kashmir kübok Budgam nung aliba CRPF camp nung sepaitem nem akhüm agutsüba sentong jakdang pai sepai ketdangsertem den külemi tasümang süngden apua liasü.
Singh dak alia Jammu & Kashmir Director General of Police (DGP), Dilbagh Singh aser CRPF tongti ketdangsertemia tasümang süngden apu.
Home Minister, Rajnath den CRPF Director General, Rajiv Rai Bhatnagar aser Home ministry nungi tongti ketdangsertem dena liasü.
Rajnath Singh-isa Jammu & Kashmir Angh, Satya Pal Malik den civil, police aser security ketdangsertem ajurua tensa asadangogo.
Yashi nikongdang Awantipora kübok Lethpora tesem nung Jaish-e-Mohammed kiralongrartemi CRPF convoy amakba lendong nung CRPF sepai 40 tepset.
CRPF-isa parnoki mangyangtsü, ta shiogo. “Onoki mamadoktsü aser tai madoktsü. Pulwama amakba mapang nung taküm tenla agutsürtem nem onoki akhüm agutsür aser ozü adianu kibongtem den nokdaker. Onoki iba ya mang ayangtsü,” ta parnoki twitter ajanga metetdaktsü.