Manipur Students’ Association Delhi adviser apu

Guwahati, February 15 (Agencies): Hokolbarnü Delhi police-i Manipur Students’ Association Delhi (MSAD) nung Advisor Thokchom Veewon apu.
Thokchom ya Manipur Students’ Association Delhi nung taoba mapang president inyak.
Manipur police aser Delhi police külem telok kati South Delhi kübok Saket nung Veewon apu, ta osang angazüker.
NSA aser Citizenship (Amendment) Bill, 2016 kübok Manipur journalist Kishorechandra Wangkhem apuba anema Manipuri kaketshir lennir Thokchom-i jembiyonga arur aser police-i pa linük anema inyakba ken o kübok tai tongoktsütsü akok.
Thokchom ya kuli kecha balaka melii aser arrest warrant medeni apu. Pa apuba osang ya social networking site aika nung prokshir
“Police-i pa dak züka merenshi, atsür ao aser slippers dena mesemdaktsü. Parnoki pa indang laptop aser mobile phone dena auya” ta Facebook nung osang ka sangoktsü.
Thokchom ya Janakpuri Police Station nung yua lir aser pa Manipur-i anir aotsü akok.
Tanü Janakpuri Police Station kima nung kaketshirtem, activists aser lawyers adenshir pa Manipur-i anir moudaktsütsü atema lungkak ait.
MSAD adviser Thokchom apuba ya “cyber crime” atema asütsü akok ta nisungtemi jembir.
“Manipur police-i ozü kidangi aru aser kü tsüraburtem indang noksa tangok. Police-i kü tsüraburtem dang kü nem ola tatokdaktsü ta amokmeren” ta Thokchom Veewon-i taoba mapang ashiba osang ka lir.
Delhi police-i arrest warrant melii Thokchom apu ta tanü Manipur Students’ Association Delhi (MSAD)-ia osang jangjatsüogo.