Dr. T. Ao North East Football atema senden ka amen

Kohima, Tsüklai/February 15 (TYO): Kohima nung February 15, 2019 Hokolbarnü CM indang Official ki nung Chief Minister Neiphiu Rio menden sür taruba Dr. T. Ao North East Football Championships asayamung atema Organising Committee senden ka ayonga agiogo.
Iba asayamung koba Kohima district kübok Indira Gandhi Stadium nung Astro Turf tasen yanglua aliba nung April 7, 2019 nungi tenzüka asayatsü lir, iba nung shilem agitsü atema northeast state ajak nungi jaoktsü terenemba lir.
North East Council, Government of India ajanga co-sponsored asütsü aser All India Football Federation o Nagaland Football Association tetuyuba kübok iba asayamung achaayanga agitsü.
Nagaland-i iba nüngtugo asayamung ayongba ya tan agi tanabuba asütsü kechiyong taoba küm state-i Dr. T Ao nüngtem nung mezüngbuba edition ayonga agiogo.
Chief Minister aser Youth Affairs & Sports, Advisor Er. Zale Neikha lenisüba kübok iba asayamung takok ngua katettsü asoshi organising committee-i maparentem inyak tenzükogo.
Iba telongjem senden nung Medical, DGP, sports department nung senior officers, Nagaland Olympic Association aser Nagaland Football Association nungi representative tem densema department ajak nungi Head tem aruagi denogo, ta osang ajanga metetdaktsü.