Reliance Foundation-i sepai kibongtem nem teyari agütsütsü

New Delhi, Tsüklai/February 16 (Agencies): Brehostibarnü Pulwama nung kiralongrartem amakba mapang asür CRPF sepai parnok 40 chirnurtem nem kaketshisatsü aser mapa agütsütsü asoshi renema aliba Reliance Foundation puri metetdaktsüogo
“Asürtem nem akhüm tetushi agütsüba temaitsü Reliance Foundation puri parnok chirnurtem kaketshitsü bushiba aser mapa bushiba ajak bendanga agitsü mulunga aliba lemsatepogo aser iba den parnok kibongtem liyonga aotsü asoshia teyari agütsütsü mulunga lir. Takoktsü dang süra onok mozükitem nung yirur aliba sepaitem temang anepalutsü asoshi renema lir. Armed Forces nem teyari ama sorkari onok nem nongloktsüba maparen ajak onok khuret ama agizüka inyaktsü renema lir,” ta Reliance Foundation-i sangdong ka ajanga Honibarnü metetdaktsü.
Kasa sangdong nungsa, kecha tashi agia India telongjem mesera kiralongrara anema raratsü mulungteter aliba meraksatettsü, ta shia lir.
“Asür kinungertem den iba mangyima tensa nung onoka dena lir. Linük-i kodanga parnok tasüaitba aser pei taküm bendanga agütsüba mamatsü. Onoki yirur aliba sepaitem takaratiba nung taneptsü angutsü sarasademtsür. Lisopur aser corporate nung shilem ka ama onok linük sepai aser sorkar den linük ajunga mang ayimba mapang dena lir,” ta maneni kasa sangdong ajanga metetdaktsü.
Reliance Foundation ya Nita Ambani lenisüba kübok Reliance Industries Limited philanthropic arm ka lir. Kasa sangdong ajanga ashiba agi, iba Foundation ajanga India tesem balala nung nisung crore ana dak tema, yimtsüng 13,500 dak tema aser jila aser yimti balala nung tesem aika nem teyari agütsüogo.