Political Party ajak longjemer Pulwama amakba aitsür

New Delhi, Tsüklai/February 16 (Agencies): Pulwama nung kiralongrartemi amakba sülen NDA sorkari ayongzüka party ajak senden ka menogo aser parnoki Kiralongraba maparen anema külemi longjemer raratsü bangzünga ayu. Linük kümzüka ayuba sepai shirnoki parnok taküm bendanga agütsüogo parnok den külemi party ajak iba anema nokdaktsü longjemogo.
Iba bangzüng nung Pakistan tenüngbo mamshi saka tawa arrtsü adener kiralongrartemi India kanga minpronga arudar aser parnok ya kidanger linük nung tashi kar ajanga ajungshiba ajanga lir, ta shia liasü.
“India iba tetsükdaktsü den kanga azüzüka inyaksangshia aruogo. Iba anema raratsü asoshi linük ajunga ola ka dang kümogo. Tanü onok asen security force tem den kiralongrar anema rartsü aser India telongjem atema longjemer nokdaker,” ta iba bangzüng nung shia lir.
Iba senden ya Home Minister Rajnath Singh-i ayongzük aser senden nung Congress nungi Ghulam Nabi Azad, Anand Sharma aser Jyotiraditya Scindia, TMC nungi Sudip Bandyopadhyay aser Derek O’Brien, Shiv Sena nungi Sanjay Raut, TRS nungi Jithendra Reddy, CPI nungi D Raja, National Conference nungi Farooq Abdullah, aser LJP nungi Ram Vilas Paswan nunger tanga züngsemtem den külemi dena liasü.
Party tem nem South Kashmir kübok Pulwama nung sepaitem amakba indang osang metetdaktsü aser tang tashi nung sorkari jenjang agia aliba indang metetdaktsüogo, ta Home Ministry nungi ketdangser kati ashi. Akali Dal nungi Naresh Gujral, RLSP nungi Upendra Kushwaha aser Jai Prakash Narayan Yadav nungera iba senden nung denogo.
Ato Kilonser Narendra Modi kübok NDA puri tang mezüngbuba party ajak senden ka ayongzüka kaogo.
Taoba mapang nung tatemsa iba mesükba party ajak senden ka LoC adena orr kiralongrartem amakba sülen party ajak nungi züngsemtem nem 2016 September ita senden ka ayonga osang agüja liasü.
Taoba mapang aser tang senden ayongba tebendangji, tangbo sorkari Pakistan anema telemtetba ka magi tsüngda party ajak senden ka ayongzükogo.
Senden tembangba sülen Congress lenir Ghulam Nabi Azad-i ashiba agi, opposition party temi home minister dang linük nung kiralongraba maparen metembang tashi sorkar den nokdaktsü ta tenangzükba agütsüogo.
Opposition party temisa Rajnath Singh dang Ato Kilonser Minister Narendra Modi dang iba ken o asadangtsü atema national aser regional party nungi tirtem ajak senden ka ayongzüktsü asoshi mepeshia asüngdangogo.
Azad-i ashiba agi, opposition party temi home minister den sepaitem taküm samaba ajaki khokoa mang ayimba lemsatepogo.
“1947 küm sülen tang lendong ka nung mezüngbuba sepaitem timba süogo. Party ajak tamangba yimsü ajak nungi lisopurtemi sepaitem mang ayimer aser iba mapa tamajung aitsüba den kanga mit adoker,” ta Azad-i osangbenertem den sensaksemba mapang ashi.
“Iba amala mangyim tensa ka nung ozü party security forces aser Jammu and Kashmir nung local police tem den dena lir,” ta paisa ashi.