Tsüngrem meimba mulungjang

Asenoki Tsüngrem asoshi tenla tulu agütsütsü akok mesüra Pa tenüng nung mapa tulu inyaktsü akok, saka asenoki angatettsüba kaji item tenla aser mapa tajungtem jagi asenoki Tsüngrem epeladaktsütettsü. Tsüngrem peladaktsütsüba mapajibo ka dang lir aser ibaji asen mulungjangji Tsüngrem meimba mulungjang asütsüla. Nisung mulungjangsa tekülakba asünungji, nisungi Tsüngrembo memeimer saka Pa meimer amato sayutsü asoshi nisungtem tsüngdang mapa tajung aika inyaka sayur aser tenlaa tulu agütsür. Ajisüaka, Hosea tapu 6:6 nung Tsüngremi ashir, ” ..ni tetepsetba tenla masü temeim takang aginür aser tarongba tenla masü, Tsüngrem metetba shisatsü aginür.” Ajisüaka, nisungtemi aiben parnok mulungjangbo Pa nungi talangka pilaa lir ser nung, tenla agi mesüra arogo aser mission mapa nung tenzükba agi Pa peladaktsütsü merangba asenoki meteta lir. 1 Samuel 15 nung asenoki züngdangra Saul chubai Tsüngremi ashibabo manga saka Pa nem tenla agütsütsü asoshi parnok tsükchir meyong san aser nashi chanutem bener aru ta Samuel ainker dang ashiba asenoki angur. Shitakba nungbo itemji apayuba agi mesamatsüi parnok agitsü bener aruba liasü saka Tsüngrem nem tenla agütsütsü bener aru ta ashiba asenoki angur. Tsüngremi ajak samajang ta ashi saka mesamatsü aser tangbo Pa nem tenla agütsütsü indang jembia sayur. Iba mapang nung Saul chuba mulungjang ateta anguba Tsüngrem komaka jashir alitsü ta bilemer. Tanü asen putu nunga asenoki ochimashiba mapa ajakji samatsütsüba ser nung apayuba agi aser aginüba agi mesamatsüi asenok atema bendener aser iba nung jagi ter shilem, temoatsü aser tenüngsang tenla agütsür. Ashiko, asenoki mangashir dang ashi, Tsüngremi ashi angabajiang asenoki tenla agütsüba dang nungi tajungba ta asen mulungjang nung shipet shidar asütsü. Aji oda, asenoki jungjunga bilemdangra, asenoki tenla tulu agütsür ta bilema agütsü saka iba tenlaji Tsüngrem tsüngdang tagizüktettsü tenla ka mesüra koda amajok asütsü ! David chuba kümer külena pai Tsüngrem tsübua inyaknungji, pai aibelenba mapatembo Tsüngremi mangu aser memetet ta bilema liasü südi, saka 2 Samuel tapu 12 nung Nathan ainker ajanga Tsüngremi David tai jakdaka puteta ashiba asenoki angutsü. Shingaia memetet asenoki Tsüngremi maginütsüsa inyaker. Asenok mulungjangbo memerük memeshi agi sünga lir saka tema nung asenoki Tsüngrem nüng sanga sayur aser Pa mapa nung jangrabangraa inyaker. Ajisüaka, David-i miima inyakba angusang aser putetsang Tsüngremji asen Tsüngrem lir. Asen Tsüngremi asenoki kechi jembir mesüra kechi inyaker mesüra kechi agütsür ta masü saka asenok mulungjang nung kechi bilemer ta asübaji dang agir. Atangji, taidok nangzük nungji Tsüngremi David dang tai adok saka pai menaba tai yari pa akoksa aser kangshi. Tenyartem mapanga Ananias aser Sapphira nati tangari tenla agütsüba jilu ajizüka tenata tena meyong ali yoker tenla tulu bener arutsüba jagi tena mulung nung ochimashi bilema inyakba taijibo Tsüngremi adoktsü ta bilema liasü südi. Ajisüaka, Tenyar mapa 5 nung tena dak kechi atalok asenoki tanü azünger. Tsüngremi asenok kechi inyaker mesüra kwi agütsür ta asübaji masü saka koma inyaker aser koma agütsür ta asübaji dang agir. Asenoki ibaji angateta Tsüngrem nem ochi aser Pa meimba mulungjang agütsüra, tenla tulu agütsüba dang nungibo tashi angaba tenlajiang tuluba ta asüba Tsüngremer taginübaji ataloktsür asütsü. Tenyar Paul-ia Tsüngrem mapa nung temulungtetba tulu agi jangrabangraa inyakbaji teperi ta kenbo bilem südi. Ajisüaka, kodang tanüla temeshi ajanga pa nem Tsüngremi mulungba angatetba shisatsü agütsü, pai 1 Korint tapu 13 nung ashi, ” ni’ kotak tenyar o agi jembiaka, ni’ shinaka, miim o ajak angatettsüsa shisatsü liaka aser tenem dena ajungdoktsüsa kü dak tamang tulu liaka, ni sensaker asoshi kü rongsen ajak bendanga agüjaaka aser kü mang tarongba tenla kümer tenla agüjaka, kü mulungjang nung temeim melira, ni kecha masü.” Tsüngremi asenok dang nungi aginübaji rongsen masü aser taküm bendanga agütsüba tenlaa masü saka shitakba Pa meimba temulungjang tenla aginür.