Khristar arogo nung chichiba sannüker ka

~ L. Kika Pongener.

Sannüker ya shirnok dang ajar ? Pastor dang-ang sannüker ta ajar asü ? Arogo nung toklang tenzüker dang ajar asü ? Atangji arogo nung lenla ajak nung tongti tenzükertem ajunga tang ‘sannüker’ ta ajatsu akok. Yisui ashi, ” Ni sannüker tajung, sannüker tajungi santem asoshi pei taküm yutsur. Shiba sannüker masü, saka aayanger tang….Pai tsunu aruya angur aser san toktsur ajener; aser tsunu jagi parnok apur aser jenshidaktsur (Yohan-10:11-13). Iba laishiba nung Yisu-i sannüker tajung ka aser aayanger sannüker ka indang atishia jembiba angur. Sannüker shirnoki pai anukba santem aser arogo kümzüka ayutsu asoshi nungsen arema, reshikangshi arema ainkar o indang-indanga jembia anuker…Parnok dangji ‘sannüker tajung’ ta ajatsu. Ajisuaka, sannüker shirnoki nungsen-nungmen marem, reshikangshi marem, pai anukba santem rongnung aser arogo telung nung mepet-mesu aser pesa-perong liaka, pei tangutsu tim dang shitak ngur-bo, pei dang anisungzüka lir-bo ojanga ta sur, arogo nung aser arogopurtem rongnung mepet-mesu liaka mangashi ama, mangu amai, kecha tebilemtsu mekai sadok-sadoka alir item dangji ‘aayanger sannüker’ ta ajatsu akok. Ano aji tang masü, sannüker shirnoki santem rongnung tashi akar o tashi makar, sentsu-aketer o sentsu-maketer bendanga amshir, kipoksema sarasadem-ia shimdanga dang aor, item sannüker dangji ‘aayanger sannüker’ ta ajatsu akok.
Ano iba laishiba nung Yisu-i arogo nung züngsem tapu ana ‘San’ aser ‘Tsunu’ agi atishia jembiba angur. Arogo nung ‘San’ ama ajemalua tashi anga-a arogo maparen ajak nung shilem tajung agia anidaker arogopur rongnung karbo alitsu sudi, saka ano arogo nung tenzükertem tsungda, arogopur rongnung mepet-mesu aser telemsa adoktsusa mojing hadir kümer pesa-perong agütsur ‘Tsunu’ amai arogopur züngsem rongnung karbo alitsu akok. Ano kanga tesasatsu kaji, arogopur nutsung rongnungi masü, saka toklang tenzüker, deacon aser tenzükla rongnungi kar mojing hadir kümer arogo nung mepet-mesu adokdakja pesa-perong agütsur-a alitsu akok. Ano kangasa taoksatsu kaji, Tsungrem-er mapa nung teintet-rogo shirnok dang arogo ‘Nukdang’ ta ajatsu akok, parnok-a dener shilem agia arogo nung mepet-mesu adokra…!!! iba raksaba yanglur-ji shirnok asütsu…??? Anungji alima aser nubortem-jibo kechi koma’ar ka sudir suang, saka Tsungrem tenzükba mapa nung teintet-rogotem, sannüker/sannükla-tem aser tenzüker/tenzükla-tembo ajak tsutsu tajung sur merukteta alitsula. Tanü asen lima nung loktiliba telemsa aser teraksa tia nung aliba ya tetsungdai ia yanglutsu asoshi nubortemi Tsungrem lar teintet-rogotem, sannükertem, laishirtem aser tenzüker/tenzüklatem dak nungi imlar. Atangji tanü arogotem nung sannüker/sannüklatem aser tenzüker/tenzüklatem teinyaktsu wadang aser khuret tulu lir, kechiyong tanü arogotem nung kinuk ajaklen nungi tzüsem-yipro tesashi agi onshitsudagi, anungji sannükertem züba-züba-a malitsula. Aji oda, sannüker shirnoki arogo anokshitsusa, arogo nung telemsa adoktsusa tzüsem-yipro tesashi agi onshitsudang, nungsen arema, reshikangshi arema, pei arogo aser santem metoktsui wazüka kümzüka ayur parnok dangji ‘Sannüker Tajung’ ta ajatsu.
Aji oda, alima loktiliba nungbo mangatettep, mepet-mesu aser telemsa alitsu akok, saka arogo nungbo kecha telemsa mekai longjema wazüka ayutsubaji sannüker/sannüklatem mapa lir. Arogo ka nung arogopur züngsem ajunga sempet kasa dangbo masütsu. Kibong ka nung tetsu kati asoba jala-jabaso rongnunga sempet balala lir, saka parnok ajakji mesadangi kasa meima anepalua mesutsubaji tsurabur ka khuret lir. Tsuraburi pei jala-jabaso rongnung kar dak-bo kanga ketasena meimtsu aser kar dak-bo meket-meseni benshira, iba kibongji kodanga sunepa malitsu. Iba kasaji sannükertemi pei santem rongnung tejak repranga, tanak-temesung bendanga benshira, iba arogoji kodanga sunepa malitsu. Anungji sannüker/sannüklatemi arogopur rongnung tashi taitba, tashi maitba ta kecha tebendang mekai ajak den kasa-sa yimjung nung alitsula. Arogo nung Sannükertem ajaki kanga junga angatettsuba kaji, arogo ya shinga nuja jurila meyong masü arok meyong, kechiyong arogoji arok tershilem, tamang tenla, saru-molok, nubotsuk aser shisatsu agi taküm alir.
Arogo züngsem rongnung karbo ajak nung ajak temeden kar, saka züngsem karbo inyakyim aser sentong ajak nungbo temeden maka…Tershilem, tamang tenla, saru-molok aser nubotsuk nungbo adentsula, saka arogo nung tenzükba mapa aser sentongtem nungbo shilem agitsu temeden maka…ta arogo inyakyim nung ali asü…!!!??? Arogo ya alima lokti-tentet kar tetuyuba nung tashi anga-a anidaktsu asü …??? Mesura Temeshi laishiba tesayuba nung amendaker anitsu…??? Arogo rongsen, terenlok mapa, inyakyim, sentong aser toklang-tenzüker itasen agütsuba, ibala ajak nungji arogo züngsem tuluba nungi shir tilaba tashi shilem dena lir masü no…??? Anungji sannükertem ajungai Yisui ashiba ama ‘Sannüker Tajung’ ta ajatsusa pei taküm aser mapa agi alima nubor matsungdang liteta sayutsula.