Rosep aser Anüshi

Junga inyaktetba agi nisungtemjiang nüngtugu aser takar akümer masü saka oshioben dena takar kümdaktsür ta asüba kuli kaji, joko, rosep aser anüshi ta asüba olong ya english oshi amai kümogo. Atangji, tang tashibo iba olong ana ya English dictionary nungbo enoka mali saka, talisa, hotel aser restaurant tulutem nung dena item chiyongtsü ana ya parnoki renemba chiyongtsütem (menu) rongnung enoksema zülua angutsü. Tetezüji, asenoki asoba rosep aser anüshi aon ya tangaria kanga sapua achir, anungji yimkong oshi akümer. Ibaji asenok ajak asoshi nümadangtsü osang tajung ka asütsü. Joko, onsara ajung aser nüngtugu aküm nungji lokti benjong chiyongdaka aika nung rosep aon aser anüshi aon angur. Alima nung tenüng tajung den rongsen yangluba mapaji yamaji tenzüker. Atangji, rosep aon ya kenü telok tulu kati aso tenzükba mapa ka masü saka kenü nisung kati alu nung aonsutsütem repdena külemi asoba nungi tenzük asütsü. Ano, Aotsür Aortemi chiyongtsü renemba rongnung anüshi yanglua ayuba mapa yabo chiyongtsü meraksadaktsüi küm piyonga yutettsüsa shisateta inyaktetba mapa ka lir. Item mapa ajakji tsüraburtem mapang nungi tenzükba tanü tashi asenok rongnunga nisung ishikati kanga temulung agüja inyakba agi tanübo asen mapa aser asenok chiyongtsüji alimai sapuba chiyongtsü ka kümogo. Iba amaji kodang asenoki alimai saputsüsa chiyongtsü ka renemtetdir, ibaji asenok atema rongsen yangludak industry ka kümadoker. Joko, tesem balala nung chiyongdak aser ano lokti benjong asoshi rosep aser anüshi aon nüngdaker asünungji, item nüngdaktemji peridaktsütsü atema aonsutsü lu tululu ayimtsü nüngdaker. Anüshi yanglutsü asoshi manü lu ayimtsü aser rosep aon atema aonsutsü lu tapu balala ayimtsü.Atangji, manü nungi adokba agibo anüshi dang masü saka rübo dena akonger, anungji anüshi aser rosep amaji rübo enoka asoba chiyongtsütema nüngtugu kümdaktsüra, ano rübo dena ayoktsüsa asenoki renemtettsü. Tajung kaji, aonsutsü lu ayimtsübo temela, anungji tanga lu melena aonsutsü lu ayimba nung asenoki temulung agütsüra, idakji tajangzük tuluba angutsü. Asenok tebilemtsü kaji asenoki rosep aser anüshi aon asotsüsa item aonsutsütemji teti agütsütettsüla. Atangji, anüshibo küm piyong meraksai achitsü atema konga ayur asünungji junger saka rosep aon asotsüba aonsutsütembo anogo aika meyutettsü. Tanü Nagaland tesem aika nung aluyimertem asoshi tebilemtsüji aji lir. Tanga lima nungbo aonsutsü aser süngjanglijang ajak küm piyong shitak asenalu amai angur, kechiyong parnokbo aonsutsü aser süngjanglijangtemji ongzüker temekong ki tulu (Cool storage) nung ayur. Itemji alu tulu ayimertemibo peisasa yanglur aser alu tilala ayimer nübortem asoshi yimkong atema government-i yanglutsür. Nagaland nunga tesem kar nungbo item temekong kitemji yangluba angashiogo, anungji aluyimertem karbo tajangzük ngua amshidar asütsü imlar. Item ama aluyimertem nüngdakbatemji inyaktsütsü atema government ket nung sentong den senotsü lir, anungji meyanglutsüi lira aluyimertemi meshitsüla. Tanü asenoki yangi aon tapu ana, rosep aser anüshi aon tangar ajaki meteta aser sapua achiba indang osang lemsatepba nükjidongji, asenoki kechi mapa inyakdir inyakaka tangari junger ta asütsüsa inyakdaktsüner. Nisung kari asenok sobaliba sü kanga junga ataker, anungji tangari parnok telok aser yim tenüng dena tetshia item abensüoshitemji bushir. Item jagi senotsü jenjang dang nungi tuluba asenok meraket jenjang atur. Kechi mapa südir süaka, tilaka asütsüa akok saka  junga inyakba nung temoatsü aika lir. Tangari metetter, mera aketer. oshi renloker aser senotsü lenmang tuluba tuluba lapoka rongsen züindaktsür. Joko, yakta asenoki züsentetba aonsutsütem gari tulu nung bener oa cool storage nung ayutsü aser ayoktsü aser ano yakta rosep aser anüshi olongtem English dictionary nung angutsü. Itemji asenoki asangsang nung atalokdaktsütettsüsa ano tajungba -tajungba aser temerangba-temerangba inyakdi.