Ano election sülen !

Joko election arurji election sülen Narendra Modi ato kilonser ser tanaben government kümer külen Naga yimten tebilemtsü ya latettsü ta BJP lenir Sanjay Paswan-i yakanü metetdaktsübaji tangatsübo osang tajung amai saka shitakba bilemdangra tezüdangtsüka lir. Taoba parliamentary election  mapanga kasa tenangzükba metetdaktsüogo aser ano talisa yaküm Nagaland assembly election mapang BJP teloki Naga nunger ajak nem teimla tuluka agütsübaji, Naga yimten latettsü asoshi kechisüdirsüaka election agitsüla ta ser election agiogo. Ano, küm asem jakdang, ato kilonser Narendra Modi-i NSCN-IM telok den yimten ken o jembia aotsü asoshi tangatettep ken o kar renemba sülen bendang lima nung dena oagi Naga yimten tebilemtsü latetogo ta jembiba osanga angashiogo. Ajisüaka, ano tanüa Naga yimten tebilemtsü ya taruba election sülen latettsü ta metetdaktsütsüsa alibaji Naga nunger atema tezüdangtsü osangji ajika asütsü. Item ajakji yimten yimsüsürtemi election nung takok angutsü atema nübortem mesüzükba o amato dang kümadokogo. Atangji, linük temzüng nung aliba ama küm pongo shia assembly aser parliamentary election-bo arupet arutsü aser election aru shia yimten telok shiai nübortem asoshi tajung inyaktsütsü tebilembatem ashitsü. Ajisüaka, tezüdangtsü kaji yimten lenirtem aikati election mapang nübortem matsüngdang jembiba ama meinyaker. Ibayongji election ka nungi ka atongdang yimten, lokti aser rongsen jenjang tajungba kümer alitsü melen tamajungbaang kümer alir. Election mapangbo kanga süoki ia jembitsü saka election temerbo tama ta asüba lima aser onükji Nagaland nung election mapang Naga yimten tebilemtsü latettsü asoshi jembiba onük ya asütsü. Atangji, taoba election nung dang masü saka Nagaland state kümer mezüng election agiba mapang nungi tenzüka election shia Regional aser National political party ajak atema tongtibangtiba onük aser mapaji Naga yimten tebilemtsü ya tatem küma latettsü asoshi jembiba ya liasü. Iba onük jembiba ajanga election shia yimten telok ajaki Naga nunger linük tenzükertem teyari agia takok angutsü meranger. Iba amaji election shia ataloker. Ajisüaka, election temerbo khen khen tenüng ka agi  tatar senden nung süoka jembir pangzüng renema ayuba dak alaka tatar senden senshir pangzüngji mapa küma inyaktsü merangbabo aiben mangur. Joko, tangbo election aruyonga election temer Naga yimten tebilemtsü ya koktsütsü ta nangzüktsübo Naga nunger adenba yimten telok asoshibo taaktsüka kümogo. Election shia Naga yimten tebilemtsü tatem küma latettsütsü nangzükba agi meputepang tali adoker ama küma, tangbo Naga nunger nüchiso bushir telok aika kümogo. Shisabolutsü kaji, tan election nunga yimten telok shiai Naga yimten tebilemtsü latettsütsü asoshi nangzüktsü aser iba tenüng nung Naga nunger yimten nüchiso bushir telok shiai yimten telok kaka yaritsü ta atalokra, Naga yimten tebilemtsü latettsü asoshi nangzüker aser meranger masü saka election nung takok angutsü asoshi jembiba aser yaritepba mapa ka dang kümadoktsü. Iba amaji mataloktsü atema tang yabo asenok ajaki jungjunga bilemdanger election agidi süra yimten tangatetba nung meraketa agitsüla. Tang tashi Naga yimten melatetteti aruba ya tangar kija dang atongtsüla masü saka asenok dak tuluka keta lir. Asenoki election mapang aser election temer külena tangari asenok akümtsübutsüsa aser asenok dak mulung lemtettsüsa meinyaker aser malir. Nagaland nung election agiba mapang sen agi sen maja endokba indang alima ajunga nung jembir aser election sülen Delhi nung Naga nunger ajak meshimetsür kümer jajaba ajaki angur. Iba jagi asenoki meteta aser memeteti alima tsüngdang aküm alur. Asenoki mangatettsüa akok, saka tang tashi asenok yimten temeten mangu kangshiba ya asenok temeten maliba agi masü aser tangari mangatetba agia masü saka asenoki kin ka ama akümketa menokdaktetba ajanga lir. Aküm akettsübaji pei temeten mayoktsü aser tangar tsüngdang meshimetsür makümtsü ta asünung dang aküm akettsü. Yimtena süang, kija-kibonga süang, kodang akümketa melitetlir tangari mezüngmeshitsü.