Tuensang DC-i license aser prangbong jangjashitsü tuyuogo

Dimapur, Tsüklai/February 20 (TYO): Taruba 2019 Lok Sabha Election dak sendakba nung Tuensang, DC L. Jamithung Lotha-i prangbong asadangtsü asoshi tetuyuba ka agütsüogo. Tuensang District kübok ozüng raksartemi election mapang lendong bener arutsütsü akok ta tangatetba nung Arms Licenses ajak den prangbong asadangtsü nüngdakba reprangteta iba tetuyuba agütsüogo.
Maneni yimjung aser tesunep nung nüburtem toktsütsü atema district nung temzüng ozüng shidak benshitsü nüngaker aser iba dak ajemdaker ozüng alema prangbong injang amshiba nokdangogo.
Anungji arms License bena alir ajak arms den parnok anasa aliba police station nung March 1 nü mesera iba masüdang oa licence aser prangbong dak sendakba nung ken o jangjashitsü asoshi tetuyuba agütsüogo. Iba tetuyuba sülen manidakra Arms Act aser Arms Rule – 2016 kübok aibelenernem tapet temerenshi agütsütsü, ta ketdangser sangdong ka ajanga metetdaktsüogo.