Kohima Forest Colony nung Forest nursery ka lapoktsü

Dimapur, Tsüklai/February 20 (TYO): Kohima Forest Colony nung forest nursery ka February 20, 2019 nü PCCF & HoFF, I. Panger Jamir IFS-i, APCCF, M.M. Ngullie IFS matsüngdang lapoktsüogo. DFO Kohima-i ashiba agi, iba nursery ya 2019 January ita yanglu aser root trainers ajanga metsütem yintetdaktsüogo aser taküm atemabo metsütem ya bare rooted form nung nursery temeket nung plastic amshiba tajemba kümdaktsütsü asoshi carton box nung seper lemtsütsü.
PCCF & HoFF-i, nursery tem nung metsü yintetdaktsüba mapang pasasaa jetsaa aoba pongdangtem amshitsü koda tongtibang iba indang jembia liasü aser iba inyakyim ajanga tarutsü nung poly bag amshiba tajemba kümdaktsütsü asoshi teyari tulu agütsütsü ta shia carton box tem amshiba tenüng asang.
Maneni APCCF-isa, department nükjidong tongtettsü atema polybags melena tanga lenmang ka bushitsü atema ajungshitsü ashi. Kasa mapang nung R O Kohima-i, rongsen ketsüng nung tajangzük agutsüba indigenous species tem tsünütsü temulung agüja inyaktsü nüngdakba lemsatep, koba ajanga taküm libaliro jenjang ajungkettsü. Kohima Central Nursery nung metsü 60,000 shi tsünütettsü aser iba den bendenloksema nursery tasenba ajanga metsü akhangba tebilemtsü tajemba kümdaktsütsü, ta ketdangser sangdong ka ajanga metetdaktsü.