NPP Nagaland State Unit-i Amit Shah dang mepelar

Dimapur, February 20 (TYO): BJP President Amit Shah-i tawa Citizenship (Amendment) Bill tanaben benoktsü ta jembiba atema mepelar, ta National People’s Party (NPP) Nagaland State Unit-i ashi.
BJP lennirtemi Northeast nung alirtem taginüba aser tejangrabatem agizüktsü atema mepishir. CAB mesüra iba dak sendakba onüktem benokra NPP-i magizüktsü, ta NPP Nagaland General Secretary-IPR, Ricky Ozukum-i ashi.
Naga yimjung olemtep atema telemtetba ka agitsü ta BJP indang Election Manifesto nung Nagaland atema nangzükba ama BJP lennirtemi tekaratiba nung Naga Peace Accord mapa küma inyaktsü mepishir. Parliament nung tang ama nübo peria alidang iba onük lemtettsü maongka tajung ka lir, ta NPP Nagaland State Unit-isa metetdaktsü.