Tejak O Tejak na

Kechiaser lai ashi, “Ni Pa sütsüng dang kongshira ni anebtsü.” Mark 5:28
Yisu Decapoli aser Galili nung tenzükdang, lokti nung pilatsü asoshi Pai teti Galil tzüyim ajanga ao. Saka telokti-i teti Pa anidak aser Pa meketa sentep. Synagogue nung tulur kati par kidangi arua par jala anebtsütsü Yisu dangi arur ashi, anungji Pai hai ta nangzük. Aji saka lenmang nung telokti Pa nungpanga alidang, tetsür kati temang nung timtem keter tebilemba kaa aru. Lai Pa den tejak shiyutepba ajuruteptsü mekoki liasü saka lai bilem, “Ni Pa sütsüng nung dang kongshira, ni ajungtsü.” Lai aji inyak saka idangyongjibo la manep. Iba sülen lai Yisu tejak shiyutepba ajurutep aser tatsüka jembir Yisui la anebtsü. Ibaji sütsüng nung kongshiba agi masü, iba jagi la anepber liaka la tamang agi la tanebtsü angu (t.34).
Na tang langka nung Yisu teyari nüngdaka lir asü? Tanü nai Pa sütsüng nung kongshitsü makok saka nai iba tetsür tamangji akatsü akok. Na noklang madak kibur tamang ama tuluba tamang akatsü akok (Mathi 8:5-13). Yohani ashi, “Pa tenüng nung kechisarena Pai mulungba ama meshiang aser Pai angashitsü aser nai meshiba Pai agütsütsü ta nai amangtsü.” (1 Yohan 5:14-15). Aji saka nai tamang agi meshitsüla aser “Pai mulungba ama meshitsüla.” Pai tajungtiba agütsüner. Na timtema lir. Ashiko na tamang uludaktsütsü Tsüngremi tendanger asütsü akok. Meshiang (tamang agi) aser nai angutsü (Mathi 7:7).
Tsüngrem, tanü ni Ne dangi aser Ne O dangi arutsü yariang. Ni tamang agi lidakjang. Amen.