UDP puri BJP-i aniba NEDA toktsüogo

Shillong, Tsüklai/February 21 (Agencies): BJP puri Citizenship Bill benoktsü asoshi mulungteter aliba sülen United Democratic Party (UDP) puri North East Democratic Alliance (NEDA) toktsüogo.
Ajisüaka UDP pur maneni state nung NPP-i aniba Meghalaya Democratic Alliance (MDA) government nungbo shilem ka asütsü, kong BJP-a densema lir.
BJP-i aniba NEDA party nung Northeast kübok UDP aser NPP densema tanga party aika densema lir.
UDP vice-president Allantry F Dkhar-i ashiba agi, BJP puri Citizenship (Amendment) Bill, 2016 benoktsü merangba anema par party-i iba telemtetba ya February 10 nü agi.
BJP national tir Amit Shah-i tawa Assam kübok Lakhimpur district semdangba mapang BJP-i taruba Lok Sabha election nung takok ngura parnoki Citizenship (Amendment) Bill, 2016 tanaben benoktsü ta metetdaktsüogo.
Teloktep sorkar kübok BJP-a densema lir asünung MDA sorkar den UDP pur maneni inyaktsü asü ta asüngdangba mapang UDP lenir-i ashiba agi, “UDP puri sorkar kümtettsü atema NPP pur pusemer, saka BJP ya MDA sorkar kübok shilem ka lir koba sorkar aniba party puri dang rasaa shitettsü. UDP puri sorkar kümtettsü asoshi BJP mejaok.”
MDA ya party trok; NPP, UDP, HSPDP, PDF, BJP aser NCP aser Independent MLA temi kümtetba sorkar ka lir.
Meghalaya state assembly nung UDP pur MLA tenet lir aser Independent MLA ana sorkar kümtetba nung densemogo.