Supreme Court-i Rafale ken o obendang reprangshitsü melungogo

New Delhi, February 21 (Agencies): Rafale deal ken o nung obendang aguja aliba meyipa reprangshitsü atema temepishiba ka tanü Supreme Court (SC)-i agizükogo.
Hombarnü activist lawyer, Prashant Bhushan-i Supreme Court dang, sorkari Rafale ken o nung tiyazü osang agutsüogo, anungji Centre sorkar ketdangsertem anema ken o angadangtsüla, ta mepishia liasü.
Chief Justice, Ranjan Gogoi-i aniba bench kati, Rafale atema temepishiba ken o pezü agüja lir, aser kabo tang tashi registry nung lir, ta metetdaktsü.
“Bench nung züngsemtem (judges) melenshitsüla. Iba ya kanga tasak. Iba atema ya onoki langka inyaktsü,” ta bench-i metetdaktsü.
Iba bench nung tanga züngsem anaji Justices- L N Rao aser Sanjiv Khanna na lir.
France nunger company Dassault dang nungi Rafale jets 36 alizüktsü atema Centre sorkari telemtetba agiba onük ya yimtenren nung mangatettep ken o tulu ka kümogo; opposition party tongti, Congress-i Rafale deal nung ochimashi tulu lir, ta aitsür.
2018 küm December ita nung Supreme Court-i, iba ken o nung ochimashi inyakba kuli mali, ta shia Rafale fighter jet deal ken o bushisüngdangtsü mepishiba magizük.
Iba ken o ya special investigation team (SIT) nem bushisüngdangdaktsütsü atema mepishi, ajisüaka SC-i ibajia magizük. Temepishiba kabo taoba mapang Union Ministers- Yashwant Sinha aser Arun Shourie nati agutsü.
Iba mapang nungji CJI Ranjan Gogoi-i, “Nisung kari melung malemba nung ajemdaker obendang agutsütsü makok,” ta shia liasü.
Ano yashi-a Dassault Aviation Chief Executive Officer (CEO), Eric Trappier-i Rafale fighter aircraft deal nung ochimashi mali, ta metetdaktsüogo.
Eric-i, “Rafale deal nung ochimashi mali. Onoki tayimtsü 36 ji agutsütsü, aser India sorkari ano tali aginüra onoki pelaseta agutsütsü,” ta metetdakja liasü.