Manipur Angh-i sorkar scheme balala metetdaktsü

Imphal, Tsüklai/February 21 (Agencies): 11buba Manipur Legislative Assembly session tenetbuba Bodhbarnü tenzükogo. 2019 atema mezüngbuba session nung Angh-i department balalai ajangtetba aser state sorkari terenlok maparen balala inyakba metetdakja liasü, ta ketdangser sangdong ka ajanga metetdaktsü.
52-Tamei (ST) Assembly constituency nungi taoba minister aser trokbuba Manipur Legislative Assembly züngsem D P Panmei asüba indanga Angh-i metetdaktsü.
Angh Dr Najma Heptulla-i ashiba agi, sorkari state nung kin balala telungjem aser tesunep nung toktsütsü asoshi takok tashi inyakdar.
Lai state sorkar takok indang jembidang, ‘Go to Village’ programme, State Level Empowered Committee’, ‘Investment Facilitation Centre’, ‘Chief Minister-giShotharabasingiTengbang’ scheme,’Manipur Start-up scheme’nunger amala amenokba indang lemsatep.
House lenir aser State chief minister N Biren Singh-i, D P Panmei iba lima nungi pilaa oadokba ya kanga dang tia maka, ta ashi.
Paisa, pa ya 1995 küm Independent ticket nungi MLA adok aser Family Welfare department minister mapaa inyakogo, ta ashi.
Panmei yimden yimsüsüba nung tetsüng ajemoka minyak tsüngda pa kaketshir aser lokti ajungtsü asoshi inyakba nisung ka liasü, shibai tenem aser lenden nung aliba nisungtem tsüngda tesendaktep tajungba atema inyaka liasü, ta CM-i ashi.
Pa Zeliangrong kin den kanga junga sendaktepa liasü ta Biren Singh-i ashiba den pa asüba janga state nung tawa ka adokdaktsüogo ta ashi aser asür kibong den asükhu lemsatep, ta kasa sangdong ajanga metetdaktsü.