Wolverine shilem agiba ajanga Hugh Jackman-i Guinness World Record ka yangluogo

Tsüklai/February 21, 2019 (Agencies): Marvel nung shilem talangtiba agiba atema Actor Hugh Jackman pa pungmang ataloka Guinness World Records holder ka kümogo.
Bodhbarnü anepdang British TV show ka nung Live Action Marvel Superhero ka ama mapang talangtiba shilem agiba atema Wolverine actor nem iba naroküm agütsü, ta aceshowbiz.com sangdong ka ajanga metetdaktsü.
Jackman shiba iba shilem küm 16 ser anogo 228 agiogo, pai iba naroküm ya Sir Patrick Stewart (Professor Charles Xavier; Professor X) den lemsaogo. Patrick-ia iba shilem kasa küm aser anogo agia liasü.
“Ni tanur asüba mapang Guinness Book of Records kü atema ajak liasü.. ni iba jenjang ngutetogo. Iba atema ya showbiz nung shilem agir, kanga pelar,” ta Jackman-i ashi.
Tawa radio interview ka nung Australia nunger actor yagi, pa indang “The Greatest Showman” soundtrack takok tajung anguba ajanga record book nung züngoksemtsü imlaba lemsatepa liasü.
“Tanur asüdang künu künaprongla nükjidongji künübo Guinness Book of Records-i aitsüba liasü. Künati ghonda 48 ken danga memeni nokdaker badminton asayatsü merang. Künatisa tekatsüla agi coin flip asütsü meranga liasü saka tangbo ni iba record book yagi iogo ta yimdangi arur,” ta paisa ashi.
Grammy Award nung Visual Media, “The Greatest Showman” atema Best Compilation Soundtrack naroküm anuba sülen pa nüngtugu EGOT club nung züngsem ka akümtsü anasabai aoba mapang ka nung hopta ishika sülen iba osang ya sangdongogo.
Jackman-i pa indang career musical theatre star ka ama tenzük aser pai tang tashi nung Emmy ka aser Tony Award ka nguteta lir. British TV show ka nung iba naroküm agütsüba sülen ghonda ishika lir pai pa indang The Greatest Showman film aser iba indang sound track nungi ajungmesoa shilem ka agia Brit Awards lapokja liasü.