PM Modi indang Biopic nung Boman-i Ratan Tata shilem agitsü

Tsüklai/February 21, 2019 (Agencies): Taruba PM Narendra Modi indang taküm otsü film nung Actor Boman Irani-i shishilembar tetsüti Ratan Tata shilem agitsü.
Iba film atema Boman Deobarnü nungi Ahmedabad nung tangok tenzükogo koba National Award nguer alisang Omung Kumar-i direct asütsü aser Sandip Singh aser Suresh Oberoi nati produce asütsü. Iba film nung Suresh Oberoi’er jabaso Vivek Anand Oberoi-i Modi shilem agitsü.
“Ni Ratan Tata den mesükteper ta social media nung aiben tangari shiogo. Pa indang shilem agitsüsa maongka ngura ni pelashishia agitsü ta bilema aruogo,” ta Boman-i ashi.
“Omung, Sandip aser Vivek nungeri kü dangi call süa iba shilem indang ashidang ni idangjisa hai ta nangzük. Iba film nung shilem agirtem jangratemtsüka lir aser Omung-i mapa tajung inyakdar. Kü shilembo onoki tangokadokogo aser kanga junga tangoktetogo,” ta paisa ashi.
“Vivek-i iba shilem agitsü asoshi kanga meranga inyakogo. Vivek artist ka ama renloka iba amala shilem tasaka ka agiba angudang kanga pelar. Pai kanga meranga inyakogo,” ta pai shisem.
Singh-i ashiba agi, Boman-i nüburtem ajungmesor aser pa indang co-actor tem den 50benbosa parnok shilem ishir.
“Pa iba film nung shilem agiba atema ni kanga pelar aser nema danga bilemer. Shingaia pa dang nungi tajungba shilem magitetla, Ni pa den film ajak nung külemi inyakner,” ta paisa ashi.
PM Narendra Modi nung Narendra Damodardas Modi tepezük tia nungi Gujarat Chief Minister akümba aser 2014 küm general elections koka Ato Kilonser akümba indang sayutsü.