NVBDCP lepa reprangshiba senden menogo

Dimapur, Tsüklai/February 21 (TYO): National Vector Borne District Control Programme (NVBDCP) lepa reprangshiba senden ka Health and Family Welfare Kohima directorate nung February 20, 2019 nü nungi 21 nü tashi kaogo. NVBDCP Directorate Additional Director, Dr. Avdesh Kumar, Ministry of Health and family Welfare, Government of India, NVBDCP state aser district nungi ketdangser aser staff tem iba anogo ana senden nung dena liasü.
Mezüngbuba anogo nung senden ya Deputy Director (NVBDCP) Dr.Neisakho Kere lenisüba kübok aka aser Mission Director (NHM) Dr.Kevichusa Medikhru-i lokti pelaa agizükba o jembia liasü. Pai, 2022 tashi nungbo state nungi ramen tashidak agintsü imlaba lemsatep aser anogo ana senden amenba ajanga India nung 2030 tashi nungbo iba tashidak agintsü nükjidong aliba nem teyari agütsütsü imlar, ta ashi. Iba sentong dak sendakba nung temetettsü kar SPO, NVBDCP Dr.I.Talitemsula-i agüja liasü.
Ojembiba mapang Dr.Avdesh Kumar-i ashiba agi, ramen tashidak ya agintsü tasak lir kechiyong iba ya vector borne tashidak ka lir koba polio, TB amala tashidak ama masü saka agent, host, environment aser vector ajak achaayangtsüsa akümer. Paisa ramen tashidak samadaktsüba atema certification asoshi jenjang ajak nung reports aser record junga bendena ayutsü koda tongtibang, iba indang jembia liasü. WHO indang 2018 world malaria report ajanga ashiba agi, ramen tashidak agi kangshidaktsüba linük 11 rongnung India ya jenjang 4 buba nung lir. Ramen tashidak tajemba akümba linük rongnung India kija lir. India nung iba tashidak shilem 24 agi tajemba kümogo, aser iba nung north east state temi shilem tulu agiogo, ta paisa ashi.
Ojembiba tembangba sülen district balalai pei district tem nung sentong balala inyakyonga aoba lemsatep aser sentong nung shilem agirtemi parnok tebilemba aser tinyaktsütem lemsatepa liasü, ta ketdangser sangdong ka ajanga metetdaktsü.