Plastic Free State atema Chief Secretary-i senden ka ayonga amen

Kohima, Tsüklai/February 21 (TYO): Nagaland ‘Plastic Free State’ akumtsü onük nung tanü Chief Secretary Conference Hall nung Nagaland Chief Secretary, Temjen Toy, IAS-i AHODs, HODs aser tanga departments den senden ka ayongzüka menogo, ta ketdangsertem osang ka ajanga metetdaktsü.
Shilem agirtem den jembidang Chief Secretary-i, iba senden ayongzükba nükjidong ya Plastic Free State maparen tejakleni bener aotsü atema lir, ta metetdaktsü.
Pai ashiba agi, tang state nung Plastic Free inyakyim agi melung masür, kechiyong sorkar telatetbatem meinyaker aser plastic amshiba azüoktsü atema inyakyim tajung mali.
Iba dak sendakba nung pai, ajaki iba mapatong mapa küma inyaktsüla; iba mapatong takok angutsü atema plastic joko mamshitsü asoshi nüburtem nem awareness agutsütsüla, ta ashi.
Iba mapatong atema asalentong yanglua inyaktsü asoshi department balala nungi Empowered Committee ka tentet.
Development Commissioner, Sentiyanger, IAS-i, iba mapatong atema tetuyuba agutsüogo, ajisüaka iba sülenji tanga mera agia meinyak, anungji iba maparen ya junga inyaktsü atema Home department-i tetuyuba ka agutsütsüla aser Deputy Commissioner ajak nema tetuyuba agutsütsüla, ta ashi.
Retd. Commissioner & Secretary to the Govt. of Nagaland, Thangi Mannen-i, state ya Plastic free akumtsü atema sorkar aser melungtet teloktem tsüngda amalitepa inyaktsüji kanga tongtibang, ta metetdaktsü.
Laisa, Nagaland nung plastic tenokdangba aguja lir, ajisüaka tang tashi plastics den tanga ‘non-perishable products’ amshiteper; anungji plastic nokdangtsü atema sorkari telemtetba takang ka agitsüla, kechiyong sorkar nungi tetuyuba tejangja ka mali, ta metetdaktsü.
Laisa municipal ajak dang peipei tesem nung plastics amshiba azüoktsü atema ayongzük. “Plastic amshiba ajanga alima mopung menentsüba dang masü saka meimchir anema-alibaren nunga kongshir, anungji mapang atemzüka yur plastic amshiba anentsüla,” ta laisa ashi.
“Melungtet teloktem, aser Arogo-ia sorkar den amalitepa inyaktsüla,” ta laisa shisem,.
Commissioner & Secretary, Urban Development, Abhishek Singh, IAS-i, plastic amshiba azüokba maparen nung local ketdangsertem nem tashi agutsütsüla; aser ibaji Kohima aser Dimapur municipalities-i yakbang ser inyakdaktsüner, ta ashi.
Commissioner & Secretary, PHE, Maongwati Aier-i, plastic amshibaren nung state nung Act ka nüngdak, ta ashi.
Chief Secretary-i “Empowered Committee” ka tentet aser iba ludenji Principal Secretary, UD, Abhishek Singh, IAS leniba nung Home, KMC, Forests, PHE, RD aser IPR departments nungi ketdangsertem züngsem asutsü.