March 4 nü Citizenship Amendment Bill atema o lemteptsü

Kohima, Tsüklai/February 21 (TYO): Citizenship Amendment Bill (CAB) onük nung o lemteptsü atema Naga Scholars Association (NSA) Kohima unit-i March 4, 2019 anüngdang 12:00 ako nung Kohima College, Kohima nung Panel Discussion ka ayongzükogo, ta osang ka ajanga metetdaktsü.
CAB indang junga angatettsü, CAB benokba ajanga Naga nunger koma kongshitsü, aser India nunger temzüng kübok Arrla 371 (A) ajanga Naga nunger CAB nungi kümzüker asü mekümzüker, ibaji tali rajemtsü nükjidong nung iba sentong ya ayongzüker, ta kasa osang nung shia lir.
Iba sentong nung Naga nunger shisashirtem, onük balala nung mongintem, legal mongintem aser loktiliba tenzükertemi shilem agitsü.
Iba sentong ya Naga nunger shisashirtem, tesayurtem, research agirtem, melungtet telok lenirtem, lenla balala nung mongintem aser tejangrar ajak asoshi ayongzüker, anungji iba sentong nung adentsü atema NSA Kohima unit president, Dr. Zavise Rume-i ajak pelashishia jaoker, ta kasa osang ajanga metetdaktsü.